Presidenti turk, Rexhep Tajip Erdogan u shpreh ”i shqetësuar” nga deklarata e bërë dy ditë më parë nga presidenti amerikan, Barack Obama që denonconte vijën politike të Erdogan-it në fushën e lirisë së shtypit në Turqi.
“Jam i shqetësuar nga fakti se këto komente janë bërë në mungesën time”, deklaroi Erdogan për median turke në Uashington, ndërsa përfundon vizitën e tij në SHBA. Këto çështje nuk janë trajtuar në axhendën e bisedimeve me Obamën.
“Nuk kemi folur për asnjë çast për këtë temë. Në bisedat e mëparshme telefonike kemi diskutuar çështje më etike se liria e shtypit”, shtoi ai, cituar nga disa gazeta, duke përfshirë të përditshmen “Hurriyet”.
Obama i cili u takua kokë më kokë me homologun turk deklaroi dy ditë më parë se nuk është më sekret, pasi për të ekzistojnë disa dinamika mjaft shqetësuese në Turqi.
