Lëkundjet e tërmetit që u ndjenë në orën 17.03 të pasdites së sotme nuk kanë shkaktuar dëme të mëtejshme në ndërtesat e dëmtuara nga tërmeti i 26 nëntorit në Vorë.
Kryetari në detyrë i bashkisë së Vorës, Gent Picari në një intervistë televizive tha se fatmirësisht nga lëkundjet nuk është shkaktuar asnjë dëm. Ai shtoi se edhe në banesat e dëmtuara nga tërmeti i 26 nentorit nuk ka patur përkeqësim të situatës.
“Normalisht ishim në mbledhje për të kaluar bonusin e qiras. U ndje tërmeti, ishte i konsiderueshëm”, tha ai.
“Unë kam dalë për të evidentuar ndërtesat që kanë qenë deri diku të dëmtuara. Jemi në terren dhe fatmirësisht nuk kemi asnjë dëm. Nuk janë agravuar, në pamje të parë, dëmet e tërmetit të mëparshëm”, tha ai.
Picari bëri të ditur se punonjësi në terren nuk raportojnë për dëme. “Të gjithë punonjësit nuk raportojnë për dëmtime. Normalisht, njerëzit kanë dalë në rrugë, po përpiqemi t’i qetësojmë. Duhet të theksojmë se shumë banorë nuk janë në pallate për faktin se janë në banesa me qira”, tha kryetari në detyrë i bashkisë së Vorës, Gent Picari.
Lëkundjet e tërmetit të pasdites së sotme ishin të magnitudës 4.3 të shkallës Rihter me epiqendër 9 kilometër në veri të Durrësit.
/a.r
