Enver Robelli, gazetari dhe opinionisti i njohur, ka treguar për DritaremeRudinën në Vizion Plus, se si i njeh ai protagonistët e këtij ndriçimi mediatik, siç e quan ai “Panama Papers”. Robelli tregon gjithashtu çastin kur u shtyp butoni i kuq i lajmit pardje në orën 20:00 në të gjithë botën.
Enver Robelli: Unë jam redaktor i politikës së jashtme në gazetën më të madhe politike zvicerane, Tages Anzeiger, e cila bashkëpunon ngushtë me Suddeutsche Zeitung të Mynihut.
Ne kemi pasur informacione prej disa muajsh që po zhvillohen hulumtime nga një ekip i gazetarëve. Ne kemi vërejtur dhe në redaksi që disa kolegë, thjesht nuk i kemi parë së fundmi dhe dje derisa unë po punoja dhe po redaktonim politikën e jashtme dhe dy minuta para orës tetë është dhënë lajmi në të gjithë botën. Kanë qenë mbi 100 redaksi në mbarë botën të cilat pas orës 20 e kanë dhënë lajmin dhe kam qenë në redaksi, kur kam parë falë edhe zhvillimit dixhital për një moment janë bllokuar të gjitha faqet e internetit të gazetave kryesore evropiane sidomos atyre që kishim mundësi t’i përcillnim kështu drejtpërdrejt sidomos Suddeutsche Zeitung.
Rudina Xhunga: Çfarë po ndodh ndërkaq pas këtij shpërthimi mediatik?
Do të ketë konsekuenca të ndryshme për këtë skandal. Në Zvicër po akuzohet autoriteti për mbikëqyrjen e financave, bankave, që në fakt vitet e fundit ka fjetur dhe nuk ka marrë hapa të rëndësishëm kundër keqpërdorimeve të mundshme financiare ndonëse Zvicra e viteve të fundit, nën presionin e qeverisë amerikane në fakt ka hequr dorë nga sekreti bankar, dhe me vite të tëra njerëzit kanë mundur të hapin llogaritë, të deponojnë miliona dhe këtë e kanë bërë kryesisht figurat e fuqishme të korruptuara. Ka qenë si një anekdotë që tregohej me vite të tëra që pesë minuta para se të jepej lajmi për vdekjen e një diktatori në Azi, më vonë merrej vesh se ai pati disa miliona në Zvicër. Kujtoj këtu se kur është rrëzuar për shembull diktatori i Tunizisë që iku në Arabinë Saudite për të zbuluar se kishte miliona në Zvicër dhe një pjesë të tyre natyrisht që Zvicra i ka kthyer në marrëveshjen me qeverinë e re të Tunizisë. Në përgjithësi kjo le konsekuenca të mëdha në vendet perëndimore dhe është një skandal që mund të nxisë distriktet financiare.
Rudina Xhunga: Po në vendet lindore?
Në këto vende ka reagime të pritshme, sepse nga qeveria ruse që mban nën kontroll të gjitha mediat nuk mund të pritet që ata të thonë po kemi gabuar dhe tani do të merren masa. Në shumë vende të lindjes kemi të bëjmë me një demokraci sa për fasadë, por e rëndësishme është që të ketë një mobilizim në perëndim se po filloi një ndryshim në perëndim atëherë edhe vendet e lindjes dhe politikanët e korruptuar nga lindja nuk do të kenë mundësi ti deponojnë të hollat në këto vende.
Rudina Xhunga: Për Kosovën, Maqedoninë, Shqipërinë priten të dhëna?
Priten të dhëna por nuk besoj se do të jenë të atij dimensioni që mund të shkaktojnë stuhi.
Pjesa e shqiptarëve të Kosovës dhe Maqedonisë ka një biografi helvetike. Me këtë, dua të them që, Thaçi, Ali Ahmeti e të tjerë, kanë jetuar në Zvicër dhe këtu i fshehin paratë e tyre. Gjithashtu ata kanë lidhje familjare të mirëfillta këtu dhe unë supozoj se paratë e këtyre liderëve tanë qarkullojnë nëpër hapësirën gjermane edhe idhulli i ri i politikës shqiptare është zoti Erdogan, që mund të luajë një rol të rëndësishëm në lidhjen vëllazërore post osmane.
Rudina Xhunga: Përtej politikës, çfarë shprese për gazetarinë është kjo që ndodhi?
Kjo është një orë e ndritshme e gazetarisë. Më duhet të them që njoh mirë punën e njërit prej atyre dy gazetarëve kryesorë të skandalit. Frederik Obermaier, në gazetën Suddeutsche Zeitung që ka zbuluar skandalin, kur kam qenë korrespondent në Zagreb, ka punuar me një hetim të rëndësishëm dhe mund të them se ato kanë qenë vrasjen që i ka kryer shërbimi sekret ndaj patriotëve kroatë dhe shqiptarë të Kosovës në Gjermani në vitet ’70-’80. Bëhet fjalë për gazetarë entuziastë shumë të mirë dhe për redaksi të cilat kanë potencial financiar që tu japin gazetarëve të hulumtojnë një vit pandërprerë. Të dy gazetarët e Suddeutsche Zeitung më kanë shpjeguar shumë mirë sesi ka ndodhur kjo. Dikush që ka pasur shansin jashtëzakonisht të thellë në dokumentacionin e firmës së avokatisë në Panama i është ofruar Suddeutsche Zeitung dhe i ka ofruar dokumente që pastaj janë verifikuar dhe këtu ka punuar një ekip prej 20 vetash vetëm nga Suddeutsche Zeitung, gazetarë me përvojë të jashtëzakonshme, gazetarë që kanë punuar për CNN, dhe mendoj se meqë nr i informacioneve ka qenë aq i papërballueshëm Suddeutsche Zeitung ka ndërmarrë një vendim që informacionet të ndahen me mbi 100 mediume në botë. Është vërtet fantastike që gjatë gjithë hulumtimeve, çështja është mbajtur në diskrecion të plotë, deri mbrëmë në orën 8, kur është prekur butoni i kuq dhe lajmi është dhënë në të gjithë botën. Natyrisht shërbimet ruse kanë pasur disa informacione se para disa ditësh zëdhënësi i presidentit Putin tha se do të ketë një atak informative kundër Rusisë, kjo është metoda e zakonshme e palës ruse për të luajtur rolin e viktimës. Shërbimet ruse me sa duket kishin informacion se ndryshe nuk do dilte zëdhënësi që të thoshte se neve po na sulmojnë këta gazetarët e perëndimit./dritare.net/
