Faturat e dritave do të printohen në vend, pas tërheqjes automatike të të dhënave të sahatit, për të shmangur gabimet e hedhjes manuale të të dhënave nga faturistët. Fatura e re ka formën e kuponit dhe përmban të gjitha të dhënat e nevojshme të konsumit. Operatori i Shpërndarjes së Energjisë demonstroi dje në Laprakë formën e re të leximit të matësit tek abonentët të cilët deri pak muaj më parë faturoheshin aforfe.
Projekti do të shtrihet edhe në disa zona të Tiranës dhe Durrësit dhe brenda vitit pritet të aplikohet në të gjithë Shqipërinë. Leximi i matësit nga Operatori i Shpërndarjes së Energjisë nuk do të kryhet me sy të lirë, madje as të dhënat e sahatit nuk do të hidhen apo shkruhen me dorë në PDA, apo ndryshe Personal Digital Assistant, por përmes një sistemi të avancuar modern, falë investimit të OSHEE-së në fushën e teknologjisë.
Drejtori i Tiranës për OSHEE-në, Klevis Jahaj, tha dje se nga kompania janë kryer investimet teknologjike të të dhënave, çka do të sjellë printimin në çast të faturave të dritave. “Jemi pikërisht në këtë zonë të Tiranës, pranë Laprakës, ku të gjithë këta banorë janë faturuar prej vitesh aforfe, madje disa nuk kishin as kontratë me OSHEE-në. Tani që flasim, këto familje kanë matës të rinj elektronikë.
Ky ishte hapi i parë drejt formalizimit të abonentëve. Hapi tjetër, po aq i rëndësishëm, është investimi i radhës së OSHEE-së në fushën e teknologjisë dhe informacionit. Prandaj, u bëj thirrje konsumatorëve të vijojnë t’i paguajë faturat e dritave, pasi çdo e ardhur për OSHEE-në do të kthehet në shërbim më cilësor për abonentët”, deklaroi Jahaj, drejtori i Tiranës për OSHEE-në.
SAHAT ELEKTRONIK
Aktualisht, sistemi me PDA-të e reja funksionon vetëm me matësit elektronikë, dhe OSHEE është angazhuar për t’i zëvendësuar të gjitha pajisjet e vjetra, pa asnjë kosto për konsumatorin. Operatori i Shpërndarjes së Energjisë shpjegoi se sistemi i ri do të mundësojë leximin online të matësit, përmes një pajisjeje, e cila i transmeton të dhënat nga matësi te PDA, nëpërmjet valëve bluetooth.
Të dhënat dërgohen në serverin qendror, përpunohen dhe plotë- son faturën, e cila printohet në çast. OSHEE vlerëson se instalimi i matësve elektronikë do të rrisë cilësinë e leximit të sahatit, duke shmangur gabimin njerëzor.
