Kombëtarja shqiptare e futbollit këtë muaj mund të shkruajë një kapitull të rëndësishëm në historinë e saj. Kuqezinjtë e drejtuar nga trajneri Sylvinho luajnë dy ndeshjet e fundit për Grupin K kualifikues të Kupës së Botës 2026. Më 13 nëntor Shqipëria përballet me Andorrën në udhëtim, ndërsa tre ditë më vonë në Tiranë vjen Anglia (e kualifikuar).
Tanët mbajnë vendin e dytë me 11 pikë, një më shumë se Serbia dhe kanë shanse reale për vendin e dytë që të dërgon në fazën play-off, nga ku do kërkohet një biletë për në finalet e Botërorit që verën e ardhshme do zhvillohet në Amerikën e Veriut. Tanët janë të favorizuar pasi edhe rivalët direkt, Serbia, ka ndeshje kundër Anglisë në Londër dhe në rast të një humbje të serbëve, kombinuar me një fitore në Andorra do i dërgonte kuqezinjtë në play-off.
Forma e legjionarëve dhe dilemat e Sylvinhos
Disa nga futbollistët e Kombëtares nuk kanë marrë minuta me klubet e tyre që pas ndeshjes kundër Jordanisë të fituar 4-2 në Tiranë, duke futur në dilema trajnerin.
Elseid Hysaj – Një muaj ka Hysaj që nuk merr minuta te Lazio. Ndeshja e fundit e luajtur prej tij daton më 4 tetor 2025 në barazimin 3-3 kundër Torinos.
Kristjan Asllani – Vetëm 11 minuta në dy ndeshjet e fundit me Torinon janë shumë pak për mesfushorin që pritet të “shpërthente” këtë sezon. Marco Baroni duket se preferon Ilic në mesin e fushës.
Armando Broja – Dy ndeshje në stol dhe vetëm 14 minuta në tre ndeshjet e fundit, ky është bilanci i Brojës që këtë sezon me Burnley ka marrë vetëm 197 minuta.
Nedim Bajrami – Fantazisti është lënë jashtë skuadre nga Rangers në Skoci, por në Kombëtare e ka një ftesë të sigurt.
Në raundin e fundit me klubet e tyre, disa nga legjionarët kanë shënuar. Medon Berisha, Arbër Hoxha, Mario Mitaj, Jasir Asani apo Indrit Tuci kanë shënuar, Myrto Uzuni ka gabuar penallti, ndërsa Ardian Ismajli ia ka dalë të asistojë. Titullarë fundjavën që lamë pas ishin gjithashtu Thomas Strakosha, Simon Simoni, Enea Mihaj, Berat Gjimshiti, Arlind Ajeti, Ylber Ramadani, Juljan Shehu, Qazim Laçi, Adrion Pajaziti, Rey Manaj.
Të premten e 7 nëntorit gjatë paradites, trajneri do shpallë listën me 25 futbollistët e grumbulluar për dy ndeshjet e radhës, teksa më pas Sylvinho do dalë para medieve.
