Ministria e Bujqesise shkarkon menjehere nga detyra Drejtorin e Përgjithshëm të Bordit të Kullimit për rajonin Korçë, Elbasan, Berat Nexhip Merolli. Ende pa u thare boja e emerimit Ministri Niko Peleshi ka shkarkuar Merollin pas publikimit te dokumentave se ai ka qene i denuar me vendim te formes se prere nga ana e Gjykates.
“Duke marrë në konsideratë faktin e bërë publik, se drejtori i Drejtorisë së Ujitjes dhe Kullimit për rajonin Korcë-Elbasan-Berat, rezulton fajtor me një vendim të formës së prerë (fakt për të cilin nuk është marrë dijeni në momentin e emërimit të tij) Ministri i Bujqësisë dhe Zhvillimit Rural, Niko Peleshi, vendosi largimin e tij të menjëhershëm nga detyra.
Qeveria e Shqiperisë s’ka pasur, s’ka dhe s’do të ketë asnjë lëkundje në mbrojtjen e pastertisë së figurës, së çdo zyrtari në varësinë e pushtetit ekzekutiv. Ministria e Bujqësisë dhe Zhvillimit Rural, falenderon dhe inkurajon çdokënd që hedh dritë mbi fakte të kësaj natyre, në funksion të moscënimit të figurës së zyrtarit të shtetit nga asnjë hije e të shkuarës në raport me ligjin”, theksohet ne deklaraten e Ministrise se Bujqesise.
Denoncimi
Pas emërimit të Drejtorit të Përgjithshëm të Bordit të Kullimit për rajonin Korçë, Elbasan, Berat Nexhip Merolli, Lëvizja Socialiste për Integrim ka publikuar një vendim gjykate që e dënonte me 150 ditë punë në interes publik.
Ka qenë sekretari i përgjithshëm i LSI-së Endrit Braimllari që ka publikuar dokumentet për Merollin i akuzuar për “Falsifikim të vulave, stampave ose formularëve”.
“Edi Rama emëron Drejtorin e Përgjithshëm të Bordit të Kullimit për rajonin Korçë, Elbasan, Berat shtetasin e dënuar me vendim të formës së prerë nga Gjykata e Rrethit Gjygjësor Korcë, Nexhip Merolli. Kryeministri i Drogës riciklon të dënuarit në poste kyçe në administratën publike. Bashkëngjitur gjeni vendimin e Gjykatës dhe urdhrin e emërimit. Kjo është Rilindja e paligjshmërisë!”, shkruan Braimllari.
