Procesi përgatitor për administrimin e zgjedhjeve po shkon sipas parashikimeve, dhe pse jo çdo gjë është përmbushur në afatet e parashikuara. Kjo është ajo që bëri të ditur Komisioneri Shtetëror i Zgjedhjeve Ilirjan Celibashi në “Intervistë” me Merita Haklajn.
Kryekomisioneri vlerësoi, të paktën nga pikëpamja teknike e organizimit, zgjedhjet e viteve të fundit kanë qenë me një standard të krahasueshëm me vendet e tjera me demokraci perëndimore. Celibashi shtoi se sfidë mbetet gjetja e operatorëve të pajisjeve për identifikimin elektronik.
“Kemi një retorikë të rënduar politike. Ka shumë konflikt, kontradikta është shumë e madhe. Kur i dëgjon si komunikojnë, duket sikur ekziston një armiqësi e thellë. Por nuk është ashtu.”
I pyetur konkretisht për çështjen e drejtuesit të koalicionit në fletën e votimit, për rastin e “Bashkë Fitojmë” Celibashi tha se bindjes së tij i qëndron deri në fund.
“Jam i bindur në drejtësinë e vendimeve të mia. Tashmë ka vendim nga gjykata, dhe do të isha i fundit që do ta komentoja vendimin. Bindja ime mbetet e pandryshuar, por nuk ka asnjë dobi që të komentoj.”
/s.f
