Sipas një raporti të publikuar nga Interpoli, thuhet se 800 mijë emigrantë libianë janë gati për të hyrë në Evropë.Sipas dokumentit të publikuar, 90 për qind e klandestinëve mund të përdorin barkat e trafikantëve për të lundruar drejt kontinentit të vjetër, ndërkohë që me shqetësim shihet edhe mundësia e rritjes së rrezikut terrorist, në kushtet kur në Libi ka të paktën dy mijë luftëtarë të Shtetit Islamik.
Deri më tani, mendohet se numri i ekstremistëve të kësaj organizate terroriste në shtetin afrikano-verior është midis 2.000 dhe 6.000 luftëtarëve. ISIS ka arritur që të vërë nën kontrollin e tij një sasi të konsiderueshme të territorit libian.
Aktualisht BE-ja po has në probleme në menaxhimin e situatës aktuale të krijuar nga emigrantët që largohen nga zonat e konfliktit në Lindjen e Mesme.
Përgjatë muajve të fundit, në Evropë kanë mbërritur edhe klandestinë nga Afrika, por numri i tyre ka qenë mjaft i ulët në krahasim me mijëra azil-kërkues që vijnë kryesisht nga Siria, Iraku dhe Afganistani. (b.an)
