Këshilli i Lartë i Prokurorisë miratoi sot në seancë plenare projektaktet e verifikimit të pasurisë dhe figurës për 6 të diplomuarit e Shkollës së Magjistraturës në vitin 2018 dhe emërimin e tyre si prokurorë.
Prokurorët e rinj të emëruar sot janë: Eliora Elezi, Erida Visoçi, Mediana Meta, Françesk Ganaj, Odeta Todorushi, Albjona Papajani.
KLP nëpërmjet Komisionit e tij të Karrierës vendosi themelin e një metode pune që do të shoqërojë këtë proces në vite: Vetingu i kandidatëve të cilët emërohen prokuror për herë të parë në hyrjen e tyre në sistem.
KLP ka kërkuar informacion të gjithë institucioneve ligjzbatuese për këta kandidatë para emërimit të tyre si prokurorë.
Në seancën plenare, relatoret lexuan raportet e verifikimit të figurës dhe pasurisë për secilin prej tyre. Këshilli i ka kërkuar kandidatëve të shprehin preferencat e tyre për caktimin në pozicion sipas vendeve vakante aktualisht në sistemin e prokurorisë dhe duke pasur parasysh nevojat e sistemit për prokurorë të rinj.
Kandidatët u miratuan me 11 vota pro si vijon:
Eliona Elezi në Prokurorinë e Shkallës së Parë Krujë
Erida Visoçi në Prokurorinë e Shkallës së Parë Vlorë
Mediana Meta në Prokurorinë e Shkallës së Parë Kavajë
Françesk Ganaj në Prokurorinë e Shkallës së Parë Lezhë
Odeta Todorushi në Prokurorinë e Shkallës së Parë Korçë
Albjona Papajani në Prokurorinë e Shkallës së Parë Berat
Me 11 vota pro, KLP miratoi edhe caktimin e përkohshëm të prokurorit Gjin Fusha në pozicionin e Drejtuesit të Prokurorisë pranë Gjykatës së Apelit Gjirokastër.
