Ne kemi zbuluar një perlë të vërtetë me “Booking.com” që pa dyshim, do të bëhet një nga destinacionet më të rëndësishme evropiane në vitin 2024, shkruan Begona Alonso në të përditshmen spanjolle “Elle España”.
Ky qytet bregdetar është shpallur si “Maldivet e Evropës” dhe është një nga destinacionet kryesore për të vizituar në vitin 2024.
Vlora është vendi perfekt për të shkuar me pushime në plazh, pasi është pagëzuar nga platforma e lartpërmendur si “Maldivet e Evropës” dhe udhëtimi zgjat vetëm pak orë.
Vlora, një qytet i vogël i vendosur në jugperëndim të Shqipërisë dhe 135 km larg nga kryeqyteti, Tirana, i cili mund të jetë një udhëtim i mirë ditor nëse doni të ndryshoni rutinën e plazhit, është pika e nisjes së Rivierës Shqiptare e ndodhur midis Adriatikut dhe Jonit.
Me ujëra blu, male mbresëlënëse dhe të arritshme për të gjithë, Vlora ofron disa nga plazhet më të bukura në Evropë, duke u bërë kështu “Kontinenti i Maldiveve”.
Mund të jetë një zgjidhje për 44% të udhëtarëve spanjollë që kërkojnë pushime luksoze me një buxhet të përballueshëm.
Vlora, qyteti i dytë port pas Durrësit, është i famshëm për historinë e saj. Aty Shqipëria shpalli pavarësinë nga Perandoria Osmane në 1912.
Nëse dëshironi të bëni pak turizëm kulturor mes kaq shumë plazheve, sigurohuni që të vizitoni Muzeun e Pavarësisë, Tarracën detare të Teqesë së Kuzum Babës, e vendosur në një kodër mbi qytet, Xhaminë Murade pranë bulevardit Vlorë-Skelë, zonën arkeologjike pranë Sheshit të Flamurit; rrugën e hebrenjve…etj.
Disa nga destinacionet më të bukura të Vlorës, thesaret e Rivierës Shqiptare janë, Gadishulli i Karaburunit, më i madhi në Shqipëri, Ishulli i Sazanit, Parku Arkeologjik antik i Orikumit, Parku Arkeologjik i Amantias, si dhe fshatrat e bukur bregdetar dhe shpellat e paeksploruara në detin Jon, Kalaja e Porto Palermos në Himarë.
Por, mos humbisni gjithashtu thesaret e mëdha natyrore si Laguna e Nartes, ishulli i Zvërnecit.
Nëse nuk i trëmbeni lartësive, kaloni urën e ngushtë prej druri në ishullin e Zvërnecit për të parë Manastirin magjepsës të Shën Mërisë.
Vlora po shfaqet gjithashtu si një destinacion i kuzhinës, pjatat do t’ju lejojnë të shijoni shijen e Italisë përtej Adriatikut, që bekon kuzhinën lokale me ushqime të freskëta deti.
Por, nëse dëshironi të provoni kuzhinën tipike shqiptare, zgjidhni tavën e kosit (mish qengji i pjekur me oriz në një salcë kosi me erëza).
/a.r
