Një mbrëmje e errët për futbollin italian. E tillë ishte e enjtja e Ligës së Evropës për futbollin e vendit fqinjë që tashmë duhet të luftojë në një mision gati të pamundur për t’i rrëmbyer Anglisë vendin e tretë në klasifikimin e UEFA-s.
Nëse në Nëntor dhe Dhjetor futbolli italian po bënte një rrugëtim mbresëlënës me klubet pjesëmarrëse në Evropë, kuotat bien në mënyrë të ndjeshme pas verdikteve të Ligës së Evropës në fazën e 1/16-ave. Ishte pikërisht Anglia që rrezikonte të rrëzohej nga shkalla më e ulët e podiumit por kualifikimi i Man. United, Tottenham dhe Liverpool për në fazën tjetër, u siguron oksigjen për momentin britanikëve.
Napoli dhe Fiorentina nuk arritën të vazhdonin rrugën për më tej dhe në garë ka mbetur vetëm Lazio, shumë pak për të rivalizuar me gjigantët anglezë që tashmë e kanë situatën në dorë. Në një natë të vetme, Anglia ngjitet në vendin e tretë të klasifikimit sezonal, ndërsa Italia rrëshqet në të pestin me një diferencë që u zgjerua ndjeshëm dhe në këtë mënyrë, bileta e katërt për një vend në Ligën e Kampionëve në sezonin 2017-2018, bëhet pothuajse e pamundur.
Anglia mban në lojë 6 nga 8 skuadrat në fushatën europiane, ndërsa Italia është në garë me tre. Në klasifikimin e këtij sezoni vazhdon të dominojë Spanja që i ka ende në lojë të gjitha skuadrat, e ndjekur nga Gjermania, Anglia dhe Rusia. Beteja më e ashpër në klasifikimin e përgjithshëm po zhvillohet mes Anglisë dhe Italisë.
Liga Premier ka një avantazh prej 3 pikësh nga Serie A por gjatë muajve të ardhshëm kjo diferencë mund të rritet dhe Italinë mund ta mbajë në lojë një mrekulli e Lazios, Juventusit apo Romës.
