12 gra e vajza u arrestuan në 2024 për ushtrim prostitucioni dhe 7 të tjera për shfrytëzim prostitucioni. Shumica e tyre janë me shtetësi të huaj, spanjolle dhe kolumbiane që e kanë gjetur Elbasanin si strehë për ushtrimin e këtij aktiviteti të paligjshëm.
“Mendoj ka ardhur si pasojë e lëvizjes së lirë sepse kryesisht ato që janë kapur janë me shtetësi të huaj që vijnë nga Kolumbia. Gjejnë terren këtu për këtë aktivitet të paligjshëm. Në zhargon quhen eskporta”, tha Demir Çiftja, avokat.
Ndërkohë psikologët e shohin në një koncept më të gjërë rritjen e rasteve të prostitucionit, për një qark me problematika të shumta ekonomike e sociale.
“Është ndërruar targeti i tutorëve, përpara kanë qenë meshkuj e tani femra. Ato e kanë ushtruar vetë dhe tani bëhen tutore të vajzave të reja, që shfrytëzohen për shkak të rrethanave familjare apo shoqërore”, tha Eriona Hoxha, psikologe.
Report TV ka siguruar shifrat zyrtare nga Drejtoria e Policisë së Elbasanit ku shihet se vepra penale më e zakonshme për gratë dhe vajzat është shkelja e rregullave të qarkullimit rrugor, me pas vjen prostitucioni, dhuna në familje, dëmtime të tjera me dashje, shfrytëzimi i prostitucionit. Në total janë 51 gra të hetuara gjatë vitit që lamë pas, kryesisht moshës 21-45 vjeçe.
