Ilir Meta, krytari i Kuvendit, njëkohësisht kreu i LSI është ndalur në qytetin e Elbasanit, ku ka vizituar një kompani të përpunimit të peshkut e cila ka punësuar brenda këtij viti rreth 450 persona. Meta tha se rasti i kësaj kompanie është për tu marrë si shembull që tregon se si vizioni dhe mbështetja për këtë sektor mund të ndihmojë në zbutjen e papunësisë në vend.
“Ky është një rast i shkëlqyer, që tregon se vizioni dhe aftësia sipërmarrëse mund të kthehet në një të mirë të jashtëzakonshme publike, jo vetëm për ekonominë lokale dhe ekonominë e vendit, por edhe për qindra familja. Një shembull për të treguar se si mund të ndihmohet për të zbutur problemin mjaft serioz të papunësisë”, u shpreh Meta.
Meta shtoi se të tilla sipërmarrje duhen mbështetur fuqimisht nga qeveria sepse janë rruga e zhvillimit dhe e punësimit të qytetarëve.
“Prandaj sipërmarrje të tilla meritojnë një vëmendje akoma më të madhe dhe një mbështetje akoma më të madhe, një raport mjaft transparent dhe korrekt nga ana e administratës. Sepse, kjo është rruga e zhvillimit, kjo është rruga e punësimit kjo është edhe rruga e integrimit evropian të vendit, duke bërë të mundur që të rrisim edhe eksportet dhe aftësitë konkurruese dhe në tregjet evropiane dhe ndërkombëtare”, – u shpreh Kryetari i Kuvendit.
Kreu i Kuvendit shoqërohej nga ministri i Transporteve Edmond Haxhinasto dhe deputeti i Elbasanit Bujar Kllogjri në këtë aktivitet.
