Një 39-vjeçar, baba i 4 fëmijëve, u ekzekutua pasditen e së hënës në Elbasan. Ngjarja ndodhi në lagjen “28 Nëntori”, ku Emiljano Rrahmani po parkonte automjetin poshtë banesës së tij.
Dëshmitarët në vendngjarje thanë për policinë se atentatorët iu afruan, ndërsa njëri prej tyre, i cili mbante maskë anti-covid, e qëlloi disa herë nga xhami i pasagjerit, duke e lënë të vdekur në vend.
Policia dyshon se autorët kanë qenë tre persona të cilët lëviznin me një makinë tip Volkswagen, që e dogjën disa kilometra më tutje, në aksin Elbasan-Peqin, mes Vidhasit dhe Paprit.
Hetuesit gjetën në makinë dhe dy kallashnikovë, ndërsa targat rezultuan të vjedhura në Tiranë, të denoncuara në komisaratin nr. 2. Ndonëse në zonë mbërritën forca të shumta policie dhe specialët e RENEA-s, nuk mundën të gjenin autorët.
Nga ana tjetër, mendohet se vrasja lidhet me konfliktet për shpërndarjen e kokainës në qytet, pasi viktima njihet nga policia si shpërndarës në Elbasan. Madje, është proceduar tre herë për këtë veprimtari kriminale, ku një herë është dënuar dhe dy herë është deklaruar i pafajshëm. (A2)
