Detaje të reja janë mësuar lidhur me vrasjen e anëtarit të bandës së Durrësit, Edmond Koçit mëngjesin e të shtunës. Burime për A2 pranë grupit hetimor kanë bërë me dije se Policia e Shtetit ka arritur që të ndjekë gjurmët që ka lënë pas makina që kanë përdorur autorët e krimit.
Të njëjtat burime sqaruan se duke përdorur xhirimet e kamerave të sigurisë është zbardhur itinerari i autorëve, që kanë udhëtuar deri në afërsi të Rinasit. Pikërisht në këtë zonë janë mbledhur të tjera kamera sigurie për të kuptuar lëvizjet e fundit të tyre në zonë. Por nuk është bërë me dije se cili ka qënë automjeti i dytë i autorëve, duke marrë parasysh faktin që makinën e përdorur gjatë vrasjes e dogjën në Sukth.
Mësohet se ‘Benzi’ i vjedhur dhe që u përdor në vrasje është e katërta makinë e vjedhur në Durrës brenda një jave. Dy ditë para vrasjes, në qytetin bregdetar u vodh një makinë tip Benz me targa AA909RV, ndërsa një ditë para krimit, një Range Rover me targa AA 110 XA. Ndërkohë edhe në Elbasan, u vodh një tjetër Benz.
Edmond Keçi alias Mond Çekiçi, u ekzekutua mëngjesin e të shtunës pranë DAR në Durrës. 40-vjeçari ishte duke udhëtuar me shoferin e tij kur një makinë Benz i preu rrugën dhe dy persona e qëlluan me breshëri duke e lënë të vdekur në vend. Ai njihej si miku i Lulzim Berishës dhe një nga personazhet më të rrezikshëm të botës së krimit në Shqipëri.
g.kosovari
