“Kjo ngjarje do pasohet nga një ngjarje tjetër ku grupi tjetër i goditur sot do të marrë hak me të njëjtin skenar”. Është ky paralajmërimi tragjik i ish-deputetit Enkelejd Alibeaj në Ditarin me Pandi Gjatën në A2 CNN, pas atentatit mafioz në Rinas ku u ekzekutua me breshëri plumbash krahu i djathtë i Emiljano Shullazit dhe mbeti i plagosur rëndë punonjësi i AMP-së.
Në A2 CNN Alibeaj theksoi se krimi e ka sfiduar shtetin sepse ushqehet nga shteti dhe këtë e bazon edhe në faktin që së bashku me Gilmando Danin, një personazh i krimit me precedentë penalë dhe i dënuar, ndodhej edhe punonjësi i AMP-së Mustafa Sheqeri.
“Krimi e ka mëse të lehtë jo vetëm për kryer vepra penale, por ndjehet i pacenuar, i pakufizuar, i pambikëqyrur. Si mund të ndodhë në një makinë një personazh i dënuar dhe i liruar nga burgu me një përfaqësues të policisë. Pse-në e kësaj e gjen në sallën e parlamentit kur ministrja e brendshme raportonte një Shqipëri të sigurt. Krimi e ka sfiduar shtetin sepse krimi është ndihmuar prej shtetit. Krimi ushqehet nga shteti me procedura korruptive prokurimesh, miqësie me pushtetarë e politikanë. Ky është një shtet që nuk e mbron jetën e qytetarëve. Aty mund të ishte bërë një masakër”, tha ai në A2 CNN.
Duke sjellë në vëmendje ngjarjet kriminale përgjatë këtij viti Alibeaj tha ky është një bilanc lufte.
“Nga 4 janari deri në 4 nëntor janë 20 raste me vrasje e përdorim tritoli, dy ngjarje në muaj pa përfshirë këtë të sotmen. Ky është bilanc lufte jo i një vendi të qetë ku siguria mbizotëron ku shteti është në këmbë”, theksoi ai në A2 CNN.
Sipas tij zgjidhja është vetëm politike, pasi shteti thotë ai është në aleancë me krimin dhe drejtuesit e policisë në qarqe caktohen nga krimi.
“Zgjidhjet janë vetëm politike, s’ka zgjidhje tjetër. Lëmë mënjanë ato të angazhimit, sofistikimit të policisë që duhet të jetë e mirëpaguar, njerëz që nuk mund të ndodhen në makinë e një të dyshuari. Nuk duhet të ketë drejtues që kanë probleme me drejtësinë. Apo drejtorë policie qarqesh caktohen në detyra prej grupeve kriminale. Zgjidhja duhet të jetë e natyrës politike. Ky lloj pushteti i kalcifikuar për shkak të aleancës me krimin këtë produkt do të sjellë” deklaroi Alibeaj në A2 CNN.
Për Alibejan qeveria nuk mban përgjegjësi, ndërkohë që kjo situatë kërkon transparencë dhe ndjeshmëri.
“Këtu nuk ka mbajtje përgjegjësish nga ministri i Brendshëm. Një qytetar ka ikur, një tjetër në gjendje të rëndë. Shumë të tjerë janë terrorizuar atje. Situata traumatike kërkon që shteti të bëjë transparencë dhe që është i djeshëm ndaj situatave. Situatë shumë e trishtë, do ketë përsëri krisma të tjera diku”, theksoi ai në A2 CNN..
Ish-deputeti shton se “Policia e Shtetit e ka shndërruar institucionin më të rëndësishëm në agjenci funerale mbledhin viktima e makina të djegura”.
Mundësitë për shmangien e këtyre ngjarjeve kriminale, për Alibeajn janë por mungon vullneti politik.
“Policia duhet të monitorojë grupet kriminale. Rrallë kanë ndodhur raste që nuk kanë lidhje me ngjarjet mafioze. Unë besoj që një agjenci kaq e madhe e policisë duhet ta ketë vendin tonë në monitorim 24/7. Mundësitë janë, por nuk duan. Aftësitë profesionale janë, është thjeshtë mungesë vullneti”
