Erion Alibej ka rrëfyer të tjera detaje për vrasjen e Bujar Çelës, vëllait të Talo Çelës. Ai tregon se vendimi për ta vrarë është marrë pas vrasjes së Klevis Kapllanit, shokut të Nuredin Dumanit, për të cilin shërbente si shofer.
Erion Alibej tregoi se për këtë ngjarje kanë marrë pjesë edhe “çunat e Fushë Krujës”, Enver Diva e Besmir Xhixha. Tentativa e parë për ta vrarë ka dështuar pasi një fqinj i shtëpisë së Talo Çelës i pa autorët të maskuar. Më pas vendosën që ta godasin te lokali ku pinte kafenë e mëngjesit.
“Tek kafja në fillim kanë qëlluar çunat e Fushë Krujës, më pas ka qëlluar dhe Nuredini”, tha Alibej.
Pas kësaj, Alibej pretendon se Nuredin Dumani e ka njoftuar se “mbaroi Bujari”.
Ai tha ndër të tjera se e ka telefonuar një oficer i policisë, për t’i komunikuar vrasjen e vëllait të Talo Çelës.
“Mua më telefonoi një oficer, Agim Lleshi, me të cilin kisha kontakt. Më tha, që po shkonin në vendngjarje, se ishte vrarë vëllai i Talos”, tha Alibej.
Pas kësaj, ai ka bërë pagesën që shkonte diku 60-70 mijë euro tek një karburant në Vorë. Të nesërmen e pagesës, Alibejn e arrestuan.
“Të nesërmen, e pashë nga kamerat që po vinte një autokolonë policie. E dija që ishin për arrestim. Nuk kam bërë rezistencë. Kam plotësuar ato formularët. Më arrestuan e që nga ajo ditë jam këtu”, tha ai.
Kujtojmë se si Erion Alibej dhe Nuredin Dumani janë të penduar të drejtësisë. Edhe Dumani ka treguar për këtë ngjarjes se Bujar Çela ishte ngjitur një vend më lart në “listën e zezë” të tij dhe Alibejt pas vrasjes së Klevis Kapllanit.
“Sa shkova te lokali e pashë Bujarin. Bujarin vendosëm që ta vrisnim pasi u vra shoku im Klevis Kapllani në 15 Shtator rreth orës 8:00 ose 9:00 të darkës”, tha ai.
Alibej dhe Dumani, sidomos ky i fundit, janë ndër emrat më të përfolur në botën e krimit. Nga dëshmitë e tyre janë zbuluar disa nga ngjarjet më të rënda kriminale në vend.
