Ky është Erjon Xhenje, 19-vjeçari i cili u ekzekutua me armë zjarri mbrëmjen e së dielës në Shkodër. Ngjarja e rëndë ndodhi teksa i riu ndodhej i ulur në një lokal në bulevardin “Bujar Bishanaku”.
Të gjitha të dhënat sugjerojnë për një atentat të mirëorganizuar.
Ndonëse fillimisht dyshohej që ngjarja mund të kishte ndodhur edhe për shkak të një konflikti të çastit, të dhënat e reja e hedhin poshtë këtë pistë. Gjithnjë sipas të dhënave të deritanishme të gazetares, autorët kanë qenë dy. Ata kanë qëlluar të paktën 8 herë në drejtim të 19-vjeçarit dhe janë larguar një moment që janë siguruar se ai kishte ndërruar jetë.
Ndonëse autoritetet policore vijojnë intensivisht punën për identifikimin e tyre, deri më tani kjo ngjarje e rëndë nuk ka ende autor. Hetuesit shpresojnë që autorët të kenë lënë gjurmë tek arma e përdorur në krim, e cila u gjet së bashku me motorin e përdorur prej tyre.
Ndërkohë në lokalin ku ndodhi ngjarja mësohet se ka 5 kamera sigurie të cilat janë sekuestruar, ndërsa dëshmitarët kanë qenë të shumtë për shkak se lokali ndodhet pranë stadiumit dhe kishte klientë që po shihnin ndeshjen.
Sa i përket motiveve, ato mbeten të panjohura. 19-vjeçari Erjon Xhenjo nuk rezulton person me precedentë penale. Ai ashtu edhe familja e tij nuk kishte konflikte me asnjë person. Ata jetonin në lagjen Guerrile dhe ishin një familje e qetë.
/a.r
