Një gjykatë anti-korrupsion e Ekuadorit ka dhënë dënimin për tetë persona si dhe ka sanksionuar tre kompani për shkak të rolit të tyre në një skemë pastrimi parash të lidhur me mafian shqiptare, raporton Daily Mail.
Sipas medias britanike, të dënuarit ishin pjesë e një rrjeti që dërgonte drogë nga Ekuadori në Evropë duke përdorur kompani të regjistruara për të pastruar asete në vlerë prej 43.4 milionë dollarësh.
Katër prej tyre u shpallën gjithashtu fajtorë për krim të organizuar, lidhur me mafian shqiptare.
Në Spanjë, të tjerë të dyshuar në këtë çështje do të përballen me gjykime të ndara. Prokurorët e Ekuadorit zbuluan se një shtetas shqiptar, i identifikuar si Dritan G, udhëhoqi këtë rrjet kriminal, bashkë me një biznesmen argjentinas dhe një ekuadorian, shkruan Daily Mail.
Grupi u dënua për krijimin e disa kompanive për të fshehur para dhe asete të paligjshme të lidhura me trafikun e drogës.
Hetimi i prokurorisë përcaktoi se udhëheqësi i këtij grupi kriminal është ende në arrati, por ata që u dënuan mendohet të jenë bashkëpunëtorë në këtë skemë.
Prokuroria kërkoi dënime nga 10 deri në 13 vjet për tetë të akuzuarit dhe shpërbërjen e tre kompanive, si dhe konfiskimin e aseteve të tyre.
