Shqipëria konsiderohet një vend me rrezikshmëri të ulët sa i përket terrorizmit dhe ekstremizmit të dhunshëm, pavarësisht disa rasteve të regjistruara vitet e fundit. Këtë e bëri të ditur në një intervistë për Radio Televizionin Shqiptar (RTSH) Drejtoresha e Qendrës Kundër Ekstremizmit të Dhunshëm.
“Rreziku i ekstremizmit të dhunshëm dhe radikalizmi që mund të çojnë në terrorizëm në vendin tonë, sot në momentet që po flasim konsiderohet një rrezik i ulët. 38 janë shtetasit që janë riatdhesuar zyrtarisht nga institucionet tona, një numër shtetasish janë rikthyer para se Kodi Penal të amendohej dhe janë ri integruar shumë mirë në shoqërinë tonë ku kanë qenë të monitoruar për një periudhë shumë të gjatë kohore dhe janë bërë pjesë e programeve të rehabilitimit. Këto qytetar rezultojnë të integruar në shkollë, në shoqëri dhe disa prej tyre janë në hapat e para të punësimit’, u shpreh Drejtoresha e Qendrës Kundër Ekstremizmit të Dhunshëm.
Vendi ynë nuk ka më pika të nxehta rreziku, por autoritetet kanë vëmendje të shtuar në zonat ndërkufitare për shkak të lëvizjeve të shtetasve të etnive të ndryshme. Qendra Kundër Ekstremizmit të Dhunshëm ka tashmë në fokus parandalimin e rasteve të mundshme.
“Kemi kanale raportimi të brendshme midis institucioneve por kemi dhe kanale raportime për publikun. Jo rrallë herë na vijnë emaile në adresën e institucionit ku na përcillen përmbajtje, apo zona të caktuara ku një individ mund të shqetësoj një qytetar apo një komunitet. Pas raportimeve ne i referojmë në strukturat përkatëse. Kur flasim për sistemin para universitar dhe për të mitur sistemi ynë në nivel kombëtar është shumë i strukturuar”, tha ajo.
Sipas të dhënave të siguruara nga RTSH, aktualisht në institucionet e ekzekutimit të vendimeve penale ndodhen 6 persona të dënuar për vepra që lidhen me terrorizmin dhe ekstremizmin e dhunshëm, ndërsa një shtetas është nën masë mjekësore për shkak të sjelljes ekstremiste që kërkon trajtim të specializuar. Në paraburgim ndodhen gjithashtu Juljan Cumraku dhe Erzen Uka, të arrestuar në Orosh të Fushë-Arrëzit.
