Bosi 56-vjeçar i ‘Ndrangheta’ Roço Morabito, i konsideruar si një nga trafikantët ndërkombëtarë më të rëndësishëm të drogës në botë, zbarkoi në aeroportin Romë-Ciampino, i ekstraduar nga Brazili, ku u arrestua më 25 maj 2021 nga policia vendase.
Arrestimi i tij ishte rezultat i një operacioni të përbashkët me karabinierët e ROS dhe Komandën Provinciale të Reggio Calabria, të mbështetur nga Shërbimi Ndërkombëtar i Bashkëpunimit Policor dhe nga agjencitë amerikane Dea dhe FBI. Ai do të duhet të vuajë një dënim prej 30 vitesh burg në shtetin italian.
Procedura e ekstradimit, e cila dukej se kishte ngecur për shkak të një çështjeje penale të hapur nga gjyqësori i Sao Paulo-s kundër Morabito-s, u mundësua falë aktivitetit intensiv të lidhjes midis ambasadës italiane në Brazil, Projektit I-Can dhe autoritetet braziliane.
Projekti I-Can, i promovuar dhe financuar nga Italia përmes Interpolit, ka krijuar një rrjet prej 13 shtetesh në mbarë botën për të luftuar kërcënimin global të paraqitur nga ‘Ndrangheta’.
Morabito ishte në qendër të një historie komplekse hetimore: i arrestuar në Uruguay në shtator 2017, më 24 qershor 2019 ai arriti të arratisej nga një burg në Montevideo, kur ishte në pritje të ekstradimit në Itali. Që nga ai moment ai kishte humbur, deri në maj 2021 kur u arrestua sërish.
Arrestimi i Morabito në Brazil u krye në ekzekutim të një urdhri paraprak në burg të lëshuar nga Prokurori Publik i Reggio Calabria, drejtuar nga Gerardo Dominijanni. Morabito u përfshi në listën e të arratisurve me rrezik maksimal që i përkasin “Programit të Kërkimeve Speciale” të Ministrisë së Brendshme. Morabito ndodhej në João Pessoa ndërsa ishte së bashku me një tjetër të arratisur nga Ndrangheta, Vincenzo Pasquino.
/e.d
