Tregtia e jashtme po “shfryhet” nga vlerat rekord të regjistruara gjatë vitit të kaluar. Shifrat e qershorit konfirmojnë edhe njëherë tendencën rënëse të dërgimit të produkteve shqiptare jashtë vendit, pasi u tkurrën me rreth 17%. Edhe importet u tkurrën me 7%.
Në gjashtë muajt e parë të vitit janë dërguar 170 milionë euro më pak mallra jashtë vendit. Faktorët kryesorë janë rënia e çmimeve në bursa për produktet që eksporton vendi, por edhe zhvlerësimi i euros me gati 17% nga një vit më parë.
Por, grupi që po përformon përtej parashikimeve gjatë këtij gjashtëmujori janë ato të ushqimeve. Edhe gjatë qershorit, më shumë fruta dhe perime shqiptare u dërguan jashtë vendit, ndërsa vendi përjeton edhe kulmin e sezonit të prodhimit.
Panorama mbetet e zymtë edhe për importet me 70 milionë euro më pak produkte që hynë në vend gjatë gjashtëmujorit. Kjo reflekton edhe ngadalësimin ekonomik, por edhe rënien e konsumit në vend.
Sa i përket vendeve me të cilat kemi kryer tregti, Kina ka filluar të jetë një partner i rëndësishëm për vendin.
Në gjashtëmujor morëm dhe dërguam më shumë mallra nga Kina duke përbërë 7% të volumit tregtar të vendit. Ndërkohë Italia vijon të mbajë vendin e parë, ndjekur nga Turqia dhe Greqia.
/f.stafa
