EKSKLUZIVE/ Sidrit Bejleri, Alma Bektashi, Jonida Maliqi dhe Genc Salihu, duket se nuk do të jenë më trajnerët edicionit të 6 të spektaklit televizv, “The Voice of Albania”. Qartazi duket se e gjithë skuadra trajnerëve të “The Voice of Albania” është përmbysur tërësisht. Pas Alban Skënderajt, që u prezantua pak ditë më parë si trajneri i ri i “The Voice”, mbrëmë stafi drejtues i këtij spektakli ka prezantuar edhe këngëtaren, Rona Nishliu, si trajneren e ardhshme të “The Voice”. Mbeten edhe dy emra të tjerë për t’u zbuluar që do të ulen në karrigen e kuqe të “The Voice”, për të plotësuar katërshen e trajnerëve të spektaklit. Është e paqartë deri tani nëse dy emrat e tjerë do të përzgjidhen nga katër trajnerët e edicionit të kaluar, apo do të jenë emra të rinj.
Kjo duket se është përmbysja më e madhe e trajnerëve të “The Voice”, që nga fillimi i këtij spektakli 5 vite më parë. Trajnerët më afatshkurtër të këtij spektakli kanë qenë Elsa Lila, Aurela Gaçe dhe duket edhe Jonida Maliqi, e cila nuk arriti të shkelqejë gjatë edicionit të kaluar. Këto tre trajnere mundën të jenë të pranishme vetëm nga një edicion. Ndërsa Elton Deda dhe Genc Salihu, mundën të jenë trajnerë në vetëm dy edicione. Trajnerët më afatgjatë të “The Voice” ishin Sidrit Bejleri dhe Alma Bektashi, të cilët janë ulur në karriget e kuqe për 5 edicione rradhazi, që nga momenti kur startoi ky spektakël. Por duket se edhe epoka e tyre e lavdisë ka mbërritur në fund. Mësohet se për Bektashin, Bejlerin dhe Maliqin, aventura në The Voice mbaron këtu. Në pikëpyetje është vetëm Salihu. Por bëhet e ditur se nuk përjashtohet mundësia që i gjithë ekipi i trajnerëve i edicionit të kaluar të zëvendësohet me emra të rinj.
Siparin e këtyre ndryshimeve e ngriti Alban Skënderaj dhe Rona Nishliu. Kjo e fundit njihet për fuqinë vokale si edhe për performancat e saj. Rona Nishliu, korri sukses ndërkombëtar në vitin 2011 kur përfaqësoi Shqipërinë në “Eurosong” me këngën “Suus”, duke u renditur në vendin e pestë. Në vitin 2014, Nishliu ishte e ftuar në koncertin e organizuar në kryeqytetin e Serbisë në nderim të figurës së Bekim Fehmiut, ku emocionoi të pranishmit duke kënduar shqip. Ashtu sikurse Rona Nishliu, për herë të parë karrigen e kuqe të “The Voice” do ta provojë edhe Alban Skënderaj.
Me. Ar
