EKSKLUZIVE / Zyrtarë të lartë të FRD-së janë treguar të rezervuar për të dalë me një qëndrim, lidhur me ftesën për bashkëpunim, që kryetari i grupit parlamentarë të PD-së, Edi Paloka, dërgoi në adresë të kreut të FRD-së, Bamir Topi.
JavaNews mori kontakte me drejtues të lartë të FRD-së për të mësuar se cili do të ishte qëndrimi i kësaj partie ndaj ftesës publike të bërë nga nivelet e larta të PD-së. “Jemi vënë në dijeni të kësaj ftese. Për momentin jemi duke e analizuar. Çdo qëndrim i yni do të bëhet publik, në momentin që për ftesën në fjalë do të ketë edhe propozime më konkrete, ndoshta jo kaq publike sa ftesa. FRD-ja është duke e shqyrtuar këtë ftesë paparagjikme, në mënyrë që të dalë me një qëndrim të qartë ndaj saj”, u shprehën për Javanews nivele të larta të FRD-së.
Selia qëndrore e FRD-së për momentin duket se është në pritje të detajimit të hapave të tjerë nga ana e PD-së, duke nënvizuar se kërkon që “procesi i dialogut të jetë pa paragjykime dhe imponime”. Në një konferencë shtypi dhënë sot nga selia qëndrore e PD-së, kryetari i grupit parlamentar të PD-së Paloka, bëri të ditur se forca politike më e madhe e opozitës, është e gatshme të bashkëpunojë me FRD-në e Bamir Topit, me kusht që ajo të deklarohet se është për rrëzimin e qeverisë.
Vetëm pak ditë më parë, kryetari i PD-së, Lulëzim Basha, zhvilloi një takim në selinë qëndrore të PD-së, me kreun e PBDNJ-së, Vangjel Dule, në një përpjekje që komentohet si lëvizja e tij për të zgjeruar mbështetjen ndaj opozitës nga faktorët politik në vend.
(javanews.al) Me. Ar
