Shtetet e Bashkuara të Amerikës janë të shqetësuar në lidhje me kandidatët për bashki me rekorde kriminale, dhe këtë shqetësim ia ka paraqitur edhe Komisionit Qendror të Zgjedhjeve. Ka qenë ambasadori i SHBA në Tiranë Donald Lu i cili ka zhvilluar një takim me KQZ, ku ka theksuar shqetësimin e ndërkombëtarëve dhe të vetë SHBA për dekriminalizim të politikës.
Burime për JavaNeës.al bëjnë të ditur detaje nga ky takim, sipas të cilave ambasadori Lu ka qenë mjaft i prerë dhe i vendosur që personat me rekorde kriminale të largohen nga listat. Po të njëjtat burime saktësojnë se Lu nuk ka pranuar asnjë alibi të ngritur nga ana e anëtarëve se po u mohohet e drejta e zgjedhjes personave, duke shtuar me vendosmëri se dekriminalizimi i politikës është me rëndësi jetike për të ardhmen e Shqipërisë.
Po ashtu Lu ka kërkuar se persona me rekorde kriminale nuk duhet të ekzistojnë as në listat e kandidatëve për këshilltarë bashkiakë.
Kjo është një kërkesë e përsëritur nga ana e ambasadës së SHBA dhe ndërkombëtarëve për rëndësinë që ka dekriminalizimi i politikës për procesin integrues të Shqipërisë në Bashkimin Evropian.
