Nuk ka më dilema. Jonida Maliqi, do të jetë trajnerja e katërt në spektaklin “The Voice of Albania” 5 që transmetohet në Top- Channel. Lajmi bëhet i ditur ekskluzivisht për JAVANEWS nga burime brenda Top- Channel.
Këngëtarja e njohur do t’i bashkangjitet në këtë mënyrë treshes tashmë të konfirmuar të trajnerëve të këtij spektakli që janë Alma Bektashi, Sidrit Bejleri dhe Genc Salihu. Ajo zëvendëson këngëtaren Elsa Lila, e cila nuk do të jetë pjesë e spektaklit. Përzgjedhja e Maliqit mësohet se nuk ka qenë një proces i lehtë, pasi ka pasur edhe mjaft kandidatura të tjera përkrah saj, të cilat ishin pretendentë për të qenë trajner në “The voice of Albania” 5.
Por më në fund drejtuesit e Top Channel kanë vendosur që t’ia besojnë Maliqit detyrën e vështirë për të qenë pjesë e ekipit të trajnerëve, që do të zgjedhë zërin më të mirë shqiptarë në “The Voice of Albania”. Për Maliqin kjo është hera e parë që angazhohet si trajnere në këtë spektakël, ndërsa Bektashi, Bejleri dhe Salihu, kanë përvojë në këtë drejtim. Për Jonida Maliqin formati i spektaklit është mjaft i njohur. Gjatë “The voice of Albania” 4 ajo ishte mysafire e Alma Bektashit, në fazën përgatitore të këngëtarëve në betejën e eleminimeve.
Ka shumë kureshti për mënyrën sesi Maliqi do të interpretojë fazat e spektaklit në përzgjedhjen e zërave në mënyrë që konkurentët e saj të shkojnë në finale e pse jo dhe të fitojnë. Pavarësisht kësaj, ajo që është e sigurtë është fakti se ajo do të dhurojë një show të vërtetë në “The voice of Albania” e sigurisht edhe shumë sharm.
