Numri i lartë i azilkërkuesve në Gjermani tashmë është kthyer në një problem për të gjithë Europën prej disa muajsh. Në mesin e tyre, janë edhe një numër i lartë shqiptarësh, të cilët janë strehuar në kampet e azilkërkuesve.
Por nëse shanset për pranimin e kërkesës së tyre janë thuajse zero, shteti gjerman u siguron atyre vendin e strehimit si dhe ushqimin. Pikërisht për këtë të fundit, duket se radha është aq e gjatë saqë për të marrë vaktin e radhës do të duhet të presësh të paktën 2 orë.
JavaNews.al sjell ekskluzivisht foto të radhës së gjatë që shkaktohet në kampet e azilkërkuesve, e cila siç shihet në foto arrin edhe në kilometra.
Për JavaNews.al, azilkërkuesit shqiptarë shprehen se çdo ditë presin në radhë rreth 2 orë për të marrë ushqimin. Sipas tyre, i vetmi racion që shërbëhet është pilaf ose makarona.
Në këtë mënyrë, shqiptarët e shumtë që kanë zbarkuar në Gjermani, kanë zgjedhur të presin me orë të tëra për një pjatë makarona ose pilaf, me shpresën (thuajse të kotë) që mund t’u pranohet kërkesa për azil.
