Ekselentët ezauruan degët më të kërkuara të universiteteve. Sipas kreut të Rrjetit Akademik Shqiptar, në mjekësi dhe inxhinieri janë plotësuar pothuajse të gjitha kuotat e pranimit.
“Ata maturantë që dhe në konkurs dhe në test, janë ata maturantë që kanë ndarë mendjen që do të bëjnë këtë degë. Mjekësia e Përgjithshme është programi i parë, i cili ka ezauruar kuotat 100%. Arkitektura vjen e dyta, është ezauruar 99%. Pastaj janë degët e tjera, kryesisht degët e teknologjisë së informacionit që kanë ecuri të mirë, janë diku te masa 50%. Duke qenë se janë degë të kërkuara shumica janë të fituara nga maturantë ekselentë, kështu që kanë qenë degë të bllokuara nga maturantë të tjerë”, tha Arjan Xhelaj, kreu i RASH.
Ata me mesataren 8.5 mbeten për të gjitha programet e tjera të studimit, madje këtë vit kanë shpëtuar edhe shumë degë të rrezikuara.
“Ata me rezultate poshtë 8.5, këtë vit fakulteti i Filologjisë, Gjuhët e Huaja, kanë pasur një ecuri të mirë. Në të gjitha programet kemi pasur regjistrime, dikur ishin dhe programe të caktuara që ishin të rrezikuara dhe reduktimi i kuotave. Programet e rrezikuara fillojnë dhe regjistrohen në fazën e pestë dhe raundin e dytë”.
Nga afro 22 mijë maturantë që kanë aplikuar për në universitet, afro 10 mijë prej tyre janë regjistruar në këto dy faza të raundit të parë./Tv Klan
