INSTAT ka publikuar të dhënat e anketës strukturore të ndërmarrjeve, të cilat tregojnë se ekonomia shqiptare vijoi të rritet edhe përgjatë vitit 2023.
Megjithëse me ritme të moderuara, numri i ndërmarrjeve aktive arriti në 117.292, duke shënuar një rritje prej 3,4 për qind krahasuar me një vit më parë.
Sektori i tregtisë mbetet dominues, duke përfaqësuar 35,7 për qind të të gjitha ndërmarrjeve.
Punësimi gjithashtu pati një rritje me 2,2 për qind, me mbi 559.900 persona të punësuar.
Sektorët e shërbimeve, si tregtia, akomodimi dhe transporti punësojnë 65,2 për qind të totalit, ndërsa sektori prodhues, ku përfshihet industria dhe ndërtimi, zënë 34,8 për qind.
Shitjet neto arritën në 3.381 miliardë lekë, por rritja ishte 0,7 për qind, duke treguar një ngadalësim të kërkesës.
Sa i përket strukturës së ndërmarrjeve shqiptare, ato të cilat konsiderohen si të mëdha me mbi 50 punonjës, përbëjnë vetëm 1,2 për qind të totalit, duke realizuar 46,9 për qind të shitjeve, por kontribuan negativisht në ndryshimin vjetor.
Ndërkohë ndërmarrjet e vogla me 1 deri në 4 punonjës përbëjnë shumicën e bizneseve, 86,1 për qind. Ato kontribuan pozitivisht në rritjen e shitjeve me 1,6 pikë përqindje.
Këto rezultate tregojnë se ekonomia shqiptare po ecën drejt një modeli të dominuar nga shërbimet, ndërsa sektori prodhues dhe ndërtimet përballen me sfida për të mbajtur ritmin e rritjes.
Politikat mbështetëse për inovacionin dhe prodhimin mbeten kyçe për një zhvillim më të qëndrueshëm.
