Guvernatori i Bankës së Shqipërisë, Gent Sejko, është shprehur pozitiv për ekonominë shqiptare si dhe përmirësimin e financave.
Në raportin e tranzicionit të BERZH 2024-2025, Sejko u shpreh se Banka e Shqipërisë ka rol kontribues në politikat industrial, për të garantuar një ekonomi të qëndrueshme.
“Roli i Bankës Qendrore, ndonëse jo i drejtpërdrejtë, është i veçantë e i pazëvendësueshëm. Banka Qendrore nuk harton politika industriale, por kontribuon në ‘to, si garantuese e stabilitetit marko-ekonomik dhe financiar, kusht themelor për zhvillim të qëndrueshëm”, tha Sejko.
Më tej, guvernatori cilësoi se ekonomia shqiptare po rritet, pasi Prodhimi i Brendshëm Bruto u rrit me 4% vitin e kaluar, duke lënë inflacionin në masën 2%. Përmirësim ka pasur gjithashtu tek kreditimi privat pasi është rritur me 16.7%, siç sqaron Sejko, por dhe rënien e raportit të kredive problematike në 4%.
“Sot mund të themi se ekonomia shqiptare po vazhdon të rritet. Prodhimi i Brendshëm Bruto u rrit me 4% në vitin 2024, inflacioni mbetet në 2%. Kreditimi privat është rritur me 16.7% dhe raporti i kredive me problem, ka rënë në nivelin historik prej 4%. Kjo pasqyron një sistem financiar të shëndetshëm, të qëndrueshëm, dhe të aftë të mbeshtesë sektorin real të ekonomisë”, tha ai.
Po kështu, për Sejkon, Banka e Shqipërisë jep një kontribut të rëndësishëm në përmirësimin e përfshirjes në financë, përshkak të anëtarësimit në SEPA, edukimit financiar, apo dhe promovimit të inovacionit financiar.
“Stabiliteti i çmimeve, sistemet financiare funksionale, një sektor bankar e një sistem pagesash modern që i shërben ekonomisë reale, janë parakushte të rëndësishme për investimet afatgjatë dhe zhvillim të qëndrueshëm të vendit. Përtej kësaj, Banka e Shqipërisë, po jep një kontribut të rëndësishëm edhe në përmirësimin e përfshirjes në financë. Kjo përmes inovacionit të sistemeve të pagesave, të anëtarësimit në SEPA, institucionalizimit të llogarisë bazike, mbikëqyrjes efektive, edukimit financiar dhe promovimit të inovacionit financiar. Këto, ndërhyrje hapin tregje dhe mundësi të reja dhe Banka e Shqipërisë do vazhdojë të japë kontributin e saj në të gjitha këto drejtime me përkushtim dhe profesionalizëm”, shtoi Sejko.
