Ekonomia shqiptarë duket se ka filluar të rikuperohet pas goditjes nga pandemia gjatë vitit të shkuar edhe pse ritmet nuk janë ato të duhurat për të kapur kohën e humbur.
INSTAT publikoi sot të dhënat në lidhje me rritjen e ekonomisë duke theksuar se gjatë tremujorit të parë të këtij viti, Prodhimi i Brendshëm Bruto i Shqipërisë u rrit me 5.53 për qind.
Sipas INSTAT, kontribut pozitiv kanë dhënë degët: Industri, Energji dhe Uji me + 2,56 pikë përqindje, Ndërtimi me +1,09 pikë përqindje, Administrata publike, Arsimi dhe Shëndetësia me + 0,97 pikë përqindje, Aktivitete të pasurive të paluajtshme me +0,58 pikë përqindje, etj.
Lajmi më i mirë në këtë rast ka të bëjë me burimin e rritjes ekonomike të vendit, i cili duket se lidhet në pjesën më të madhe në investimet që ka bërë biznesi gjatë kësaj periudhe.
Kjo do të thotë se biznesi ka besim se ekonomia do të ketë ecuri të mirë gjatë muajve në vijim duke bërë kështu edhe investime në drejtim të përmirësimin të teknologjisë apo zgjerimit të kapaciteteve.
Ndërkohë, problem mbetet konsumi i qytetarëve, i cili mbetet ende pranë niveleve të periudhës së pandemisë.
g.kosovari
