Një mision i agjencisë së OKB-së për siguri bërthamore është nisur për në centralin bërthamor të Zaporizhias në Ukrainë.
Ekipi përbëhet nga drejtori i IAEA Rafael Mariano Grossi, nga Argjentina, dhe 13 ekspertë të tjerë nga vende të tjera, por nuk përfshin anëtarë të SHBA-së ose të Mbretërisë së Bashkuar. Ndër vendet që do të marrin pjesë janë edhe Italia, Shqipëria, Franca, Jordania, Meksika dhe Maqedonia e Veriut.
Rafael Grossi, drejtor i përgjithshëm i Agjencisë Ndërkombëtare të Energjisë Atomike tha se ekipi pritej të mbërrijë në termocentral gjatë kësaj jave, shkruan BBC.
“Ne duhet të mbrojmë sigurinë e objektit më të madh bërthamor të Ukrainës dhe Evropës”, shkroi ai në Twitter.
Centrali bërthamor është pushtuar nga trupat ruse që nga muaji mars.
Luftimet rreth objektit në juglindje të Ukrainës kanë çuar në rritjen e shqetësimit global mbi sigurinë.
Ukraina dhe Rusia kanë akuzuar njëra-tjetrën për bombardimin e zonës.
/a.r
