Eileen Higgins ka fituar zgjedhjet për kryetare bashkie në Miami, duke shënuar fitoren e parë të një demokrateje në qytet pas pothuajse tre dekadash. Ish-komisionerja e qarkut siguroi 59% të votave në balotazh, duke mposhtur kandidatin republikan Emilio Gonzalez, i mbështetur nga presidenti Donald Trump, i cili mori rreth 41% të votave, sipas rezultateve zyrtare.
Gjatë fjalës së fitores, 61-vjeçarja Higgins deklaroi se qyteti “zgjodhi një drejtim të ri” dhe se votuesit “zgjodhën kompetencën mbi kaosin”. Ajo u bë gjithashtu gruaja e parë që drejton Bashkinë e Miamit.
Higgins premtoi të nisë menjëherë punën për të adresuar sfidat kryesore të qytetit, duke theksuar se “Miami është një qytet që u përket të gjithëve”.
Gjatë fushatës, ajo u përqendrua te çështje si emigracioni dhe strehimi i përballueshëm, duke u distancuar qartësisht nga politikat e Trump. Në një intervistë për El País, Higgins u shpreh se ajo dhe ish-presidenti “kanë pikëpamje shumë të ndryshme” për trajtimin e komuniteteve të emigrantëve. Në debatin zgjedhor, ajo i cilësoi politikat e tij të zbatimit të emigracionit “çnjerëzore dhe mizore”.
Megjithëse gara ishte zyrtarisht jopartiake, Higgins mori mbështetjen e disa figurave të njohura demokrate, përfshirë ish-sekretarin e transportit Pete Buttigieg. Ndërkohë, Gonzalez kishte pas vetes mbështetjen e Trump dhe guvernatorit të Floridës, Ron DeSantis.
Higgins do të zëvendësojë kryebashkiakun në largim Francis Suarez, i cili kohët e fundit kërkoi shkurtimisht nominimin republikan për president.Fitorja e saj vjen në një moment kur Partia Demokratike ka shënuar disa rezultate të rëndësishme në SHBA muajin e fundit, përfshirë zgjedhjet në New York, Virxhinia dhe New Jersey.
