Vetëm katër ditë përpara se Komisioni Europian të publikojë progres-raportin, në të cilin për herë të parë pritet që të rekomandohet hapja e negociatave për vendin tonë, shtypi gjerman pyet nëse është me vend të pranojmë Shqipërinë në Europë?
Sherri i ditës së djeshme në Parlament ka bërë jehonë në shtypin gjerman dhe dy gazetat me tirazhin më të madh në vend, “Bild” dhe “Der Standard” kanë publikuar me tonet tejet kritike ngjarjen.
“Disa vezë, pak miell dhe në Parlamentin Shqiptar bëhet një kek”, ironizon “Bild”.
Presioni i shtypit gjerman kundër hapjes së negociatave është gjëja e fundit që i duhej Shqipërisë në këtë moment.
Pak muaj më parë, Kancelarja Merkel u rikonfirmua për një mandat të katërt, por pa kapur shumicën parlamentare dhe vetëm pas disa muaj krize të tejzgjatur politike dhe si kurrë më parë, pozitat e saj në Parlament janë të brishta.
“Alternative fur Deutschland”, e përkthyer “Alternativa për Gjermaninë”, është një parti e ekstremit të djathtë, anti-emigracion që në zgjedhjet e fundit njohu një rritje eksponenciale dhe tashmë është forca e tretë në vend, pas CDU-së dhe social-demokratëve, dy grupimet më të mëdha politike, që kanë njohur një rënie të vazhdueshme të popullaritetit në vitet e fundit.
Në këto kushte, presioni i “Afd” dhe forcave të tjera anti-emigracion, për bllokimin e negociatave me vendet e Ballkanit do të jetë më i fortë se kurrë dhe pozitat e Merkelit në Parlament nuk janë aq të forta, sa të mos shqetësohet nga ky presion.
“Preteksti” që opozita me duart e saj i jep forcave anti-europiane, në këto kushte mund të rezultojë shumë i dëmshëm, sidomos duke pasur parasysh që shumë prej vendeve kryesore europiane kanë njohur vitet e fundit një rritje të vazhdueshme të frymës eurospektike.
Vetkuptohet, nëse edhe në Gjermani, bindja për nevojën e zgjerimit fillon të lëkundet, atëherë integrimi për vendin tonë është shumë i rrezikuar./Lexo.al
