Gjatë vitit 2017 bizneset kanë rritur depozitat në banka, një tregues ky i formalizimit të ekonomisë dhe rritjes së kapitaleve për injektime të reja në ekonomi.
Sipas të dhënave nga Banka e Shqipërisë vetëm gjatë vitit të fundit, depozitat e korporatave të tjera financiare u rritur me 15%, apo rreth 18.8 miliardë lekë (137 milionë euro).
Stoku i depozitave në fund të muajit nëntor 2017 shënoi 997.5 miliardë lekë, apo rreth 7.3 miliardë euro. Depozitat në këtë muaj u zgjeruan me rreth 2.2 miliardë lekësh (+0.2%), në krahasim me muajin e mëparshëm
Depozitat bankare kanë ndjekur trendin rritës , ndonëse BSH-ja ka ulur ndjeshëm normën bazë të depozitave, që prej shtatorit të vitit 2011, edhe kthimi vjetor që merret nga kursimet ka rënë vazhdimisht për të arritur në rreth 1% aktualisht për kursimet 12-mujore.
Kjo ka ndikuar në faktin që individët të kërkojnë alternativa kursimi më fitimprurëse, si investime afatgjata (mbi 2 vjet), blerjen e letrave me vlerë të qeverisë, blerjen e pasurive të paluajtshme etj.
Në krahasim me nëntorin e vitit 2011, kursimet me afat të rezidentëve ranë me 94 miliardë lekë, ose gati 690 milionë euro. Depozitat e individëve me afat në lekë përbënin 26% të totalit në nëntor 2017, nga 40.5% që ishte kjo peshë në 2011-n./ATSH
a.ç
