Denida Rexhepi, edukatorja e një kopshti privat në Tiranë, e dyshuar për ushtrim dhune ndaj fëmijëve gjatë ushtrimit të detyrës së saj, do të hetohet në masën e sigurisë “arrest në burg”.
Gjykata e Tiranës pranoi kërkesën e Prokurorisë për lënien në qeli të 30-vjeçares, të paktën deri në një vendim të dytë gjyqësor.
Edukatorja Rexhepi nga ana e saj mohoi kategorikisht dyshimet e Prokurorisë, duke pohuar se nuk kishte dhunuar të miturit që kishte në përkujdesje.
Pretendimet e të dyshuarës dhe avokatit të saj nuk bindën gjyqtarin e gatshëm, Altin Shkurti. Rexhepi u paraqit në sallën e gjyqit rreth mesditës, në një gjendje tejet të rënduar emocionale.
Seanca gjyqësore për caktimin e masës së sigurisë ndaj saj u zhvillua me dyer të mbyllura për publikun. Burime brenda sallës bënë me dije se përfaqësuesi i Prokurorisë i ka thënë Gjykatës se ndaj 30-vjeçares janë depozituar kallëzime për të paktën dy raste të ushtrimit të dhunës prej saj ndaj fëmijëve të mitur.
Sipas prokurorit, nga analizimi paraprak që u është bërë pamjeve filmike të kamerave të sigurisë së kopshtit, është krijuar dyshim i arsyeshëm se Rexhepi ka konsumuar elementë të veprës penale të “keqtrajtimit të të miturit”.
Për këtë shkak, duke iu referuar rrezikshmërisë së veprës penale dhe rrethanave të ngjarjes, prokurori kërkoi caktimin e masës së sigurisë “arrest në burg” për të. Pretendimi i tij është kundështuar me forcë nga ana e avokatit të Rexhepit.
Sipas burimeve, avokati ka pretenduar se e mbrojtura prej tij nuk ka kryer asnjë vepër penale dhe ka kërkuar lirimin e saj nga qelitë e paraburgimit.
“E mbrojtura prej nesh nuk ka ushtruar dhunë fizike apo psikologjike ndaj të miturit. Ajo është edukatore e përkushtuar dhe gëzon dashurinë e fëmijëve të kopshtit ku ka ushtruar detyrën”, është shprehur mbrojtësi.
Në lidhje me episodin e përmendur nga prokurori, i filmuar edhe nga kamerat e sigurisë, avokati ka pohuar se ka qenë vetëm një tërheqjeje vëmendjeje nga ana e edukatores dhe jo një veprim i dhunshëm.
“Dy fëmijët kanë qenë konfliktuar me njëri-tjetrin dhe edukatorja vetëm u ka tërhequr vëmendjen, asgjë më shumë”, është shprehur mbrojtësi.
Pretendimet e avokatit janë konfirmuar më pas edhe nga e dyshuara Rexhepi. “Nuk është e vërtetë. Nuk kam ushtruar dhunë ndaj asnjërit prej fëmijëve në kopsht”, ka pohuar ajo nga kafazi i xhamtë i sallës së gjyqit.
Pasi është njohur me pretendimet e palëve, gjyqtari Altin Shkurti vendosi lënin e saj në paraburgim deri në hetimin e plotë të rastit. Ngjarja u denoncua nga prindërit e disa fëmijëve që thanë në polici e më pas në prokurori se kishin parë ndryshimin e sjelljes së të miturve dhe shenja dhune te fëmijët.
Po kështu, verifikimi i kamerave të sigurisë në kopsht, sipas Prokurorisë, nxori në pah faktin se fëmijët ishin dhunuar në disa data të ndryshme nga ana e edukatores./Panorama
