Kryeministri Edi Rama ishte një ndër të ftuarit specialë në mbrëmjen Gala “Topi i Artë 2025”, që po zhvillohet sonte në Teatrin Kombëtar të Operës dhe Baletit.
Para se të lexonte emrin e Lojtarit, kryeministri duke mos lënë pas as batutat u ndal tek Kombëtarja Shqiptare dhe kontributi i saj në lartësimin e emrit të vendit tonë në arenën ndërkombëtare. Kur “shqiptarët nuk bëhen bashkë as për një orë”, kryeministri Rama e cilësoi fanellën kuqezi si një privilegj që rrëmben dhe bashkon të gjithë shqiptarët në një lumë emocionesh.
“Unë nuk dua të mbaj një fjalim, sepse këtu jemi në mbretërinë e Armand Dukës, do flasë mbreti vetë. Dua që në radhë të parë të komplimentoj mbretin për organizimin, është çdo vit e më i mirë dhe më spektakolar dhe dua që ta komplimentoj që ka rritur shumë nivelin e të ftuarit.
Ndërkohë që duke ju referuar një bisede që kam pasur fatin të bëj me Cambiason, më kujtohet një fjalë që më ka mbetur një mendje, që më tha se për të luajtur me fanellën e Argjentinës një futbollist është që të dhurojë të dyja këmbët, sepse realisht fanella e kombëtares që kam pasur rastin ta vesh, është diçka komplet tjetër. Këtë e kemi të qartë falë djemve të kombëtares që kemi këtu të pranishëm, trajnerit, se si ajo fanellë na përfshin të gjithë në një lum emocionesh.
Kur shqiptarët që nuk bëhen bashkë as për një orë, në ndeshjet e kombëtares bëhemi bashkë si qelizat e të njëjtit organizëm. Ky është privilegji i madh për ata që veshin fanellën, por edhe për ata që kanë pasur fatin të ndjekin ndeshjet e kësaj kombëtareje që kemi pasur kohët e fundit”, tha kryeministri Edi Rama.
Teksa nuk la pas as batutat për moderatorin e spektaklit Ardit Gjebrea dhe presidentin e FSHF-së, Armand Duka, Rama lexoi dhe emrin e futbollistit që fiton çmimin “Lojtari për i mirë i Kombëtares”, Berat Gjimshiti.
“Është vërtet kënaqësi, që kapitenit të kombëtares t’i lexoj emrin. Duke të falenderuar për gjithçka bën si forcë e shembullit në fushë. Faleminderit që na bëre të harrojmë dhe Lorik Canën se mendonim që nuk do të na dilte nga mendja. Të uroj sa më shumë forcë dhe vullnet për të drejtuar çunat aty nga prapavija”, tha kryeministri Rama.
