Kuba po zhvillon vaksinën e saj kundër Covid-19: “Soberana 02”, prodhuar nga Instituti Epidemiologjik Kuban, “Finlay”.
Vaksina, pasi të miratohet, do të ofrohet falas për popullatën e ishullit të Karaibeve, por edhe për turistët që do të vijnë për ta vizituar atë.
Lajmi bëhet i ditur nga faqja e internetit të gazetës “Las Noticias”, e cila citon drejtorin e institutit, Vicente Verez, i cili garanton sigurinë dhe efektivitetin e ilaçit.
Vaksina “Soberana 02”, e cila po hyn në fazën e tretë të eksperimentimit me 150 mijë doza që do të injektohen tek vullnetarët, është e sigurt dhe ka treguar një fuqi të lartë të imunizimit.
“Ajo shkakton një kujtesë imune të qëndrueshme, e cila, përveç se prodhon antitrupa, i bën ato të qëndrueshme”, tha Verez në një konferencë-video nga Organizata Shëndetësore Panamerikane.
Havana, shkruan gazeta, është e përkushtuar të krijojë 100 milionë doza të vaksinës së prodhuar vetë për të imunizuar popullatën. Një privilegj që do të shtrihet gjithashtu për këdo që dëshiron të vizitojë vendin si turist./a.p
