Kryetari i komunës së Malishevës, Ragip Begaj, ka thënë të mërkurën në mbrëmje për gazetën “Zëri” se nuk mban mend që qyteza që ai drejton të jetë përfshirë sikurse kësaj radhe në vërshime.
“Kemi arritur të kalojmë këtë katastrofë pa ndonjë pasojë në njerëz. Kemi pasur problem me evakuimin e nxënësve sepse nuk ka pasur mundësi të depërtojmë nëpër Malishevë. Edhe qytetarët në dializë kemi pasur problem t’i evakuojmë, por edhe aty ia kemi dalë”, ka thënë kryetari i komunës së Malishevës.
Ai ka thënë se po vazhdojnë të qëndrojnë në gjendje gatishmërie, ndonëse orët e mbrëmjes situate paksa është qetësuar. “Situata është qetësuar tashmë pak në mbrëmje”, ka thënë Begaj. Ai ka shtuar se gjatë ditës në qytezën që drejton ka pasur ujëra të mëdha.
“Sido që të jetë kemi kaluar pa pasoja në njerëz dhe kjo është më e rëndësishmja. Dëme materiale ka të mjaftueshme. Tash për tash nuk mund të japim një vlerësim se sa janë ato dëme. Shumë biznese janë dëmtuar, sikurse edhe shumë ekonomi familjare që janë goditur nga vërshimet”, ka thënë i pari i komunës së Malishevës.
Begaj ka thënë se Malisheva gjatë tërë ditës ka qenë e bllokuar dhe nuk ka pasur mundësi lëvizjeje në rrugën Duhël – Kijevë sikurse e bllokur ka qenë edhe rruga nga Banja e Malishevës në drejtim të Lubizhdës. “Më vonë është bllokuar edhe rruga nga Rahoveci në drejtim të Arllatit. Malisheva ka qenë tërësisht e bllokuar”, ka thënë kryetari i komunës.
Ai ka thënë se policia edhe zjarrëfikësit kanë bërë një punë të mirë, derisa në gatishmëri kanë qenë gjitha drejtoritë përgjegjëse komunale. Një sfidë do të mbetet sanimi i dëmeve.
“Dëmet si komunë nuk kemi mundësi t’i përballojmë. Do të kërkojmë mbështetje nga niveli qendror. Po shpresojmë që ata të mund të na ndihmojnë, pasi ne nuk kemi fonde për të përballuar këto dëme që na janë shkaktuar”, ka thënë i pari i Malishevës, Ragip Begaj.
