Task Forca e ngritur nga Ujësjellës Kanalizime Durrës për menaxhimin dhe përballimin e furnizimit me ujë të pijshëm të popullatës gjatë stinës së verës ka kryer një kontroll në aksin Ura e Gjoles (Fushë Krujë) deri në Shijak.
Punonjës të repartit të Shijakut kanë kontrolluar me imtësi 65 subjekte private dhe familjare. Për këtë periudhë edhe lavazhet janë ndaluar që të përdorin ujin e pijshëm për larjen e automjeteve.
Përgjegjësi i repartit të Shijakut Ivo Doci është shprehur se 5 lavazheve përgjatë rrugës nacionale që gjenden në Fushë Prezë iu është ndërprerë furnizimi me ujë, ndërsa në 3 lavazhe të tjera është konstatuar se ato furnizoheshin me ujë pusi.
Ujësjellës Kanalizime Durrës iu ka bërë thirrje të gjithë abonentëve që të kursejnë ujin e pijshëm dhe të mos e shpërdorojnë kot, pasi stina e thatë e verës po ndikon në pakësimin e prurjeve të ujit që vjen nga burimi i Fushë Kuqes.
Paralelisht me kontrollet që mbulon reparti i Shijakut në aksin nga Fushë Kruja deri në Durrës, edhe grupet e tjera të UKD-së janë angazhuar në terren për ndërprerjet e lidhjeve të paligjshme të ujit në rrjetin e Ujësjellësit si dhe penalizimin e abuzuesve të ujit.
a.ç