Policia ka shkuar sërish në shtëpinë e familjes Samson në via Homs, në lagjen afrikane, në Romë.
Specialistët e policisë janë kthyer pasditen e së shtunës në shtëpinë ku Mark Samson ka rrëfyer se ka vrarë ish të dashurën e tij shqiptare Ilaria Sula, në orët e para të mëngjesit të 26 marsit.
Studenti 23-vjeçar filipinas dha versionin e tij para gjykatësit gjatë marrjes në pyetje, por sipas mediave italiane, në rrëfimin e tij ka pika të paqarta. Veçanërisht të lidhura me rolin që kishte nëna e të riut që ndodhej në shtëpi në atë moment dhe gjithashtu në natën e mëparshme, pra 25 marsit.
Oficerët rrethuan hyrjen në ndërtesë për të kryer një sërë kontrollesh teknike që mund të çojnë në një ndryshim të rrjedhës së hetimeve. Prandaj mund të ketë një rindërtim të ngjarjes, që ndryshon nga ajo që djali ka deklaruar deri më tani. Inspektimi i ri do të shërbejë për verifikimin e deklaratave të fundit të Markut.
Gjatë këqyrjes së banesës ku ndodhi krimi, hetuesit policorë sekuestruan edhe kompjuterin personal të Mark Samsonit, i cili tashmë do të analizohet për të verifikuar një sërë informacionesh që i riu mund të ketë dhënë gjatë marrjes në pyetje dhe gjithashtu për të rindërtuar marrëdhënien që kishte me ish të dashurën e tij, Ilaria Sula.
Deri më sot, gjurmët e gjakut që i përkisnin viktimës janë gjetur vetëm në dhomën e saj të gjumit ku dyshohet se është kryer vrasja, por hetuesit duan gjithashtu të kuptojnë se çfarë ndodhi në pjesën tjetër të banesës kur Ilaria hyri pas orës 21:30 të datës 25 mars.
