Një rregull i pashkruar në kompaninë më të madhe ajrore të Hong Kongut “Cathay Pacific” i detyronte stuardesat të mbanin veshur vetëm funde, ose minifunde. Megjithëse personeli femëror i fluturimeve kërkonte prej kohësh të lejohej të vishte pantallona, kompania ngurronte, aq sa në lojë hynë së fundi edhe sindikatat, shkruan Javanews.
Shtypi kinez njofton se një marrëveshje mes kompanisë “Cathay Pacific” dhe përfaqësuesve sindikalë u arrit më në fund dhe tani stuardesat do të mund të veshin pantallona, për herë të parë nga viti 1946, qëkur kompania në fjalë u themelua.
Prej kohësh stuardesat ishin ankuar se veshja e fundeve i kishte ekspozuar ndaj aktesh të përsëritura të ngacmimit seksual gjatë fluturimeve, por kompania nuk e kishte marrë parasysh këtë rrethanë, perfundon Javanews.
