Fatlumi, një djalë 12-vjeçar shqiptar, u rrah barbarisht në janar të këtij viti nga pesë djem më të mëdhenj se ai, në oborrin e shkollës në Walenstadt të St. Gallenit. Ai pësoi tronditje truri dhe gërvishtje në pjesë të ndryshme të trupit dhe përfundoi në spital.
Dhunimi i Fatlumit bëri bujë në media, sepse ai u rrah vetëm nga fakti se ishte me prejardhje të huaj dhe shqiptar, transmeton albinfo.ch. Por, ndonëse personat (të gjithë zviceranë autoktonë) që e kishin rrahur u identifikuan dhe u denoncuan, por ata nuk do të ndiqen penalisht. Shkak për këtë është arritja e pajtimit përmes tyre.
“Ndërmjetësimi është prej shumë vitesh pjesë përbërëse e procesit të të drejtës penale për të rinjtë”; thotë një zëdhënës i prokurorisë së St. Gallenit. Sipas tij, kur kushtet për ndërmjetësim janë plotësuar, atëherë prokuroria e njofton si viktimën ashtu dhe fajtorin. Në këto raste të dyja palët nënshkruajnë një marrëveshje të përbashkët. Rrjedhimisht, procedura e ndjekjes së 5 të rinjve është ndërprerë dhe marrëveshja mes tyre është e plotfuqishme./a.m.
