Një ngjarje e rëndë ka ndodhur mbrëmjen e sotme në fshatin Krutje të Lushnjës. Sipas informacioneve paraprake, Florian Dalladaku 45-vjeçar ka sulmuar me sqepar dy prindërit e tij, duke i shkaktuar vdekjen nënës dhe plagë të rënda babait.
Deri në këto momente nuk janë bërë publike detaje të tjera mbi gjendjen e tij shëndetësore.
Menjëherë pas krimit, Florian Dalladaku është larguar nga vendngjarja me automjet në drejtim të paditur. Policia ka nisur një operacion për lokalizimin dhe kapjen e tij, ndërsa ka rrethuar zonën dhe po kryen kontrolle për të përcaktuar vendndodhjen e të dyshuarit.
Sipas informacioneve të para, Dalladaku dyshohet se vuan nga probleme të shëndetit mendor. Deri tani, megjithatë, nuk është bërë publik ndonjë informacion zyrtar.
“Rreth orës 21:20, në fshatin Zhymë, Lushnjë, shtetasi F. D., 45 vjeç, dyshohet se, në banesë, për motive ende të paqarta, ka goditur me një send metalik prerës (sqepar) nënën e tij, shtetasen F. D., 80 vjeçe, e cila, si pasojë e plagëve të marra, ka humbur jetën, si dhe ka plagosur rëndë babain e tij, shtetasin H. D., 77 vjeç, i cili ndodhet në spital, nën kujdesin e mjekëve.
Shtetasi F. D., i cili dyshohet se vuan nga probleme të shëndetit mendor, është larguar nga banesa pas ngjarjes. Shërbimet e Policisë po vijojnë kontrollet për lokalizimin dhe kapjen e tij.
