Detaje të reja janë zbardhur lidhur me aksidentin e rëndë të regjistruar këtë të hënë në aksin Kabash-Porocan në Gramsh, pranë fshatit Bardhaj. Policia ka konfirmuar përmes një njoftimi zyrtar se nga ky aksident ka humbur jetën një person.
Viktimë ka mbetur 43-vjeçarja, Dëshira Hoxha. Bëhet me dije se ajo ishte infermiere. Mësuesja Albana Boja ka mbetur e plagosur rëndë dhe është transportuar në gjendje kritike drejt Spitalit të Traumës në Tiranë.
Drejtuesi i kamionçinës ndodhet në gjendje të rëndë shëndetësore dhe është dërguar për trajtim mjekësor në spitalin e Gramshit.
“Gramsh/Informacion paraprak. Në aksin rrugor “Gramsh-Porocan”, kamioni me drejtues shtetasin Sh. K., 38 vjeç, ka dalë nga rruga. Si pasojë e aksidentit janë dëmtuar drejtuesi i kamionit, shtetasi Sh. K., dhe shtetasja A. B., pasagjere, të cilët janë transportuar për në spital për ndihmë mjekësore, ndërsa ka humbur jetën shtetasja D. H., 43 vjeçe, pasagjere në kamion.
Grupi hetimor po punon për zbardhjen e rrethanave dhe shkaqeve të aksidentit”, njofton policia.
