Në një lidhje telefonike me Blendi Fevziun, në emisionin “Opinion”, gazetari shqiptar në Athinë, Robert Goro, tha se përllogaritet që të jenë të paktën 12 mijë fëmijë emigrantësh shqiptarë që kryejnë shërbimin ushtarak grek, që është 9 muaj.
Duke folur për deklaratat e Ministri të Mbrotjes grek, Panos Kamenos, i cili kërkoi dënimin maksimal për shtatë rekrutët me origjinë shqiptare, të cilët u fotografuan duke bërë me duar simbolin e shqiponjës, Goro u shpreh ato nuk janë gjë tjetër veçse përpjekje të tij për të fituar elektorat, duke shfrytëzuar retorika nacionaliste.
“Dashje pa dashje ata janë bërë pjesë e një teorie konspirative, që Ministri aktual i Mbrojtjes i ka jashtëzakonisht për shtat, duke parë edhe kuotat në rënie të partisë së tij politike, që në çdo moment, të vejë në dukje vokacionin patriotik që shkon gati gati në nacoinalizëm. Kjo është edhe aryesja përse e ka rrokur këtë ngjarje, në kohën që partia kryesore e qeverisëse, Syriza ka mbajtur një qëndrim totalisht të kundërt.”
I pyetur nga Fevziu për kërkesën e Nënkryetarit të partisë Demokracia e Re, për një seancë parlamentare – interpelancë me Ministrin e Mbrojtjes dhe krerët e tjerë të sigurisë së vendit, Goro tha se një kërkesë e tillë është e vërtetë, por nuk bëhet fjalë për një seancë të jashtëzakonshme, por për një interprelancë.
“Bëhet fjalë për një interpelancë, jo për një seancë të jashtzakonshme më duhet ta sqaroj këtë dhe si të gjitha interpelancat do të mbahet atëherë kur do të planifikohet në programin e parlamentit.”
Goro tha se kjo fotografi në vetvete nuk përfaqëson asgjë tendencioze, por janë segmente të caktuara në Greqi të cilët kërkojnë që “t’i hedhin benzinë zjarrit”.
“Duhet thënë që kjo ngjarje ka shërbyer për të ringjallur edhe njëherë nacionalizmin. Që në momentin e parë ajo pjesë që përpiqet t’i hedhë benzinë zjarrit menjëherë tentoi për ta parë si një mënyrë për të nxitur nacionalizmin, ndërkohë që gjithë pjesa tjetër kanë pasqyruar opinione shumë më të hapura, këta i përkasin atyre që e kanë marrë me sportivitet. Fatkeqësisht opinion është i ndarë mëdysh”.
Goro, tha gjithashtu se si gazetar nuk e dinte sesi mund të argumentohej bërja e një shenje që përbën vepër penale dhe rrezik integriteti, megjithatë këtë e ka në dorë drejtësisa.
Fotografia e 7 ushtarëve me origjinë shqiptare e shkrepur brenda repartit ushtarak në Mesologji të Greqisë, shkaktoi një furtunë të vërtetë përgjatë javës që lamë pas, duke tensionuar sërish marëdhëniet mes dy vendeve. /tvklan.al/
