Një refugjat sirian në Gjermani, 25 vjeç, gjeti 50 000 euro si edhe një librezë kursimi me vlerë 100 000 euro, në një aparament të vogël që ia kishte dhënë në përdorim një shoqatë bamirëse dhe i dorëzoi ato në Zyrën e Imigracionit.
Ngjarja ndodhi në Minden, një qytet me 80 mijë banorë, në Vestfali. Duke lëvizur një dollap, në shtëpinë që i ishte dhënë për t’u sistemuar, pas mbërritjes nga Siria, djaloshi gjeti një sirtar të fshehtë pas tij. Atje ishte edhe i gjithë ”thesari”, bankënota me prerje 100 dhe 500 euro, si edhe një librezë kursimi.
”Nuk u mendova dy herë, mora shumën dhe ia dhashë një nëpunësi të Zyrës së Imigrimit. Ai lajmëroi menjëherë policinë që tani po heton origjinën e gjithë këtyre parave, pronari i të cilave nuk dihet ende”, tha emigranti, i cili është shndërruar në heroin e qytetit.
“Ky njeri është shembull për të gjithë”, thuhet në një deklaratë të policisë./a.k
