Dy ditë pas vendimit të presidentit Ivanov që t’ia japë mandatin atij që do të grumbullojë 61 deputetë, për të cilën nuk dha afat kohor, nga partitë askush nuk përgjigjet ku kanë mbërri negociatat dhe a janë afër për formimin e shumicës së deputetëve.
LSDM do të përpiqet që në periudhën e ardhshme të mbledhë më së paku 61 deputetë që të ketë shumicë dhe të marrë mandatin, thonë shkurtimisht nga partia duke mos dhënë detaje të tjera.
Nga ajo çfarë është e njohur, Lëvizja Besa ka 5 deputetë dhe do ta mbështesin inciativën e kryetarit të LSDM-së, Zoran Zaev, që të merr mandatin, e pastaj do të bisedojnë pa paragjykuar se çfarë do të ndodhë. Edhe nga “Aleanca për Shqiptarët”, e cila kanë tre deputetë, thonë se do ta mbështesin iniciativën e Zaevit për të mbledhur nënshkrimet, shkruan REL, transmeton Zhurnal.
Kjo do të thotë se LSDM-ja, që ka 49 deputetë, me mbështetjen nga këto dy subjekte, Lëvizjen Besa dhe “Aleancën për Shqiptarët” do të kenë 57 nënshkrime, dhe do t`i mungojnë edhe katër për të formuar shumicën e nevojshme.
Për këtë çelësi kryesor ende mbetet BDI me dhjetë deputetë, por nga kjo parti zyrtarisht nuk ka njoftime se a kanë ndonjë kontakt me LSDM-në pas vendimit të presidentit Gjorgje Ivanov. Kryetari i BDI-së, ALi Ahmeti në intervistën e mbrëmshme në televizionin TV Art, tha se VMRO-DPMNE dhe BDI, të cilët kishin mundësi që të dakordohen për qëndrimet e tyre prej 9 deri më 29 janar, nuk arritën që të bëjnë marrëveshje për të formuar qeveri, sepse partia e Gruevskit nuk ka pranuar kushtin për të vazhduar puna e PSP-së.
Nga VMRO-DPMNE sot në pyetjen se a ka ndonjë lajm të ri dhe vallë po bëhen përpjekje të reja për të formuar shumicën, thonë se do t’ju informojmë nëse ka momente të reja. Që aty, theksojnë se do të bëjnë përpjekje maksimale që të respektohet vullneti i shumicës së qytetarëve që kanë votuar më 11 dhjetor, por insistojnë se mbajtja e zgjedhjeve të reja është zgjidhja më e mirë.
Nga PDSH, që ka dy deputet, pas zgjedhjeve thuajse nuk kanë asnjë informacion për planet e tyre për koalicion të ardhshëm.
Pas deklaratave të përfaqësuese të komunitetit ndërkombëtarë, veçanërisht të Komisionit Europian, që presin një konsensus të gjerë politik dhe një koalicion të gjerë është hapur edhe ajo alternativë, veçanërisht nëse asnjëra palë nuk arrin që të formojë shumicën.
Ahmeti në intervistën e mbrëmshme tha se si dalje nga kriza politike duhet një debat më i gjerë, i cili mbi gjitha duhet të jetë në mes të VMRO-se dhe LSDM-së, të cilët duhet të bisedojnë mes vete. Për ato është e hapur edhe mundësia për një koalicion të gjerë, një skenar që Zaev tha se nuk është i pranueshëm participimi në qeverinë e ardhshme me udhëheqjen aktuale të VMRO-DPMNE-së dhe personave të akuzuar nga PSP.
VMRO-DPMNE vazhdimit konfirmojnë se koalicionet e gjëra asnjëherë nuk i kanë sjellë diçka të mirë Maqedonisë, shkruan REL, transmeton Zhurnal. (b.an)
