Xhilda Grëmi, nënë e dy fëmijëve, një djali 12-vjeçar dhe vajze 5-vjeçare, rrëfen në emisionin “Stop” në Tv Klan se pas 13 vitesh martesë, është ndarë nga bashkëshorti për shkak të dhunës së përsëritur, që kulmoi dhe rrahjen në sy të fëmijëve në Greqi. Ajo bëri denoncim, mori urdhër mbrojtjeje, u strehua në qendrën e grave të dhunuara dhe u kthye në Shqipëri pas një marrëveshjeje që burri të hiqte dorë nga alkooli.
Por, sipas Xhildës, dhuna dhe kërcënimet vazhduan edhe në Fier. Burri sërish e ofendoi dhe e kërcënoi para fëmijëve duke shkaktuar një tjetër urdhër mbrojtjeje. Situata u rëndua kur ai filloi të ndikonte tek djali derisa e largoi nga nëna. Më vonë, babai mori vajzën me pretekstin se do ta çonte në pishina dhe nuk e ktheu më. Prej disa muajsh Xhilda nuk ka as komunikim telefonik me fëmijët.
Në shkollë, gjyshërit kanë firmosur një deklaratë që djali të mos takohet me nënën, gjë që e pohon edhe mësuesja kujdestare.
Mësuesja: Shkolla nuk është vend takimi.
Nëna: Mua nuk më latë.
Mësuesja: Sepse për fëmijën tënd kujdeset dikush tjetër.
Nëna: Po jam unë prindi.
Mësuesja: Më dëgjo pak, o Xhilda, të lutem! Për fëmijën tënd kujdesen të tjerët dhe personat e tjerë, nuk japin autorizimin e tyre që ti të vish në shkollë ta takosh.
Nëna: Nuk e japin personat e tjerë?
Mësuesja: Jo, nuk e japin. Nuk duan. Erdhi gjyshi me gjyshen këtu që biseduam ne me ata dhe e kanë lënë me deklaratë që ne nuk lejojmë djalin të dalë.
Nëna: Jo, pak më parë më thatë që ta takoj unë, nëna.
Mësuesja: Brenda oborrit!
Nëna: Nënën?
Mësuesja: Po!
Nëna: Po si mund të mos lejojë gjyshja nënën të takojë fëmijën?
Mësuesja: Të lutem, mos më fut në muhabete që s’më takojnë!
