Kryeministri i Shqipërisë, Edi Rama ka gjetur kohë të japë intervistë ekskluzive për Nacionalen. Natyra e saj ka të bëjë me zhvillimet aktuale kryesisht në rajon, por edhe me temat përtej zonave të banuara me shqiptarë.
Rama shprehet i bindur se “firmat janë mbledhur” dhe Hashim Thaçit, apo vëllait të tij siç e quan vetë, do t’i pastrohet figura e tij nga trafikimi i organeve i raportit të Dick Martyt.
Pyetja e parë nga gazetari Berat Buzhala vjen lidhur me mbështetjen ndaj Erdoganit që Rama ia dha përmes një video-mesazhi.
Gjatë intervistës, Buzhala ia kujton faktin se shqiptarët e Turqisë janë thuajse të asimiluar krahasuar me arbëreshet e Italisë.
Dita e djeshme në Shqipëri u karakterizua me arrestimin e Fredi Belerit, opozitarit të Himarës, me të cilin Rama pati polemikë, por kryeministri thotë se hetimet për Belerin patën filluar para polemikës.
Fenomeni i trojeve shqiptare në muajt e fundit, Luiz Ejli, që fitoi Big Brotherin, nuk kaloi pa u përmendur në intervistë. Buzhala ia kujtoi Ramës se ky karakter hyri në Big Brother si demokrat e doli si socialist.
E personi që e kurorëzoi Luizin me gruan e tij, kryetari i Bashkisë së Tiranës, Erion Veliaj që po garon sërish për zyrë, ka zgjedhur të mos dalë në përballje me kundërkandidatin e tij nga PD, Roland Bejkon.
Kjo gjë komentohet nga Rama, por gjithashtu edhe fakti se VV-ja e Albin Kurtit nuk garon në këto zgjedhje, për dallim nga zgjedhjet e fundit atje.
Gjatë intervistës, Rama flet edhe për raportet e tij me Kurtin dhe Osmanin, por gjithashtu komenton edhe shkrimin e prestigjiozes The New York Times, për presidentin serb, Aleksandër Vuçiq.
Krejt në fund, Vlora Hyseni – e larguar nga Qeveria e Kosovës prej pozitës së saj në drejtimin e AKI-së, është rekrutuar nga kryeministri Edi Rama, për ta drejtuar Shërbimin Sekret të Shqipërisë.
Për këtë çështje Rama dha arsyet e veta pse ka vendosur ta emërojë Hysenin në atë pozitë të rëndësishme, por theksin e furi te fjalimi i saj si eprore para nëpunësve të saj më të ri, për të cilin kryeministri tha se është fjalimi më i mirë që ka dëgjuar ndonjëherë.
Në Shqipëri, zgjedhjet lokale do të mbahen këtë të diele, ndërkohë që herën e fundit kur ato u mbajtën, partia e Ramës (PS), kishte fituar çdo bashki sepse opozita nuk mori pjesë.
Shtatori i radhës, Ramës i rrumbullakon një dekadë si drejtues i Shqipërisë nga Zyra e Kryeministrit, por me të përfunduar mandatin e tij të tretë, do t’i bëjë 12 vjet kryeministër.
